Qazaqstan men Ózbekstannyń jemqorlyqpen kúres organdary Memorandýmǵa qol qoıdy
QR Sybaılas jemqorlyqqa qarsy is-qımyl agenttigi baspasóz qyzmetiniń habarlaýynsha, 16 maýsymda qazaqstandyq delegatsııa Tashkentte (Ózbekstan) Ekonomıkalyq Yntymaqtastyq Uıymyna qatysýshy elderdiń sybaılas jemqorlyqqa qarsy kúres organdary basshylarynyń jáne ombýdsmenderiniń 4-shi otyrysyna qatysty.
Ortalyq Azııa men Taıaý Shyǵystyń 10 memleketiniń sybaılas jemqorlyqqa qarsy vedomstvolarynyń ókilderi sybaılas jemqorlyqqa qarsy saıasatty damytý jáne sybaılas jemqorlyqqa qarsy is-qımyl salasyndaǵy ózara is-qımyl máselelerin talqylady.
M. Ahmetjanov Qazaqstanda qylmystyq-quqyqtyq salada, sondaı-aq sybaılas jemqorlyqqa qarsy is-qımyl jáne tsıfrlandyrý salasynda júrgizilip jatqan reformalar týraly habarlady. Ol osy baǵyttarda qabyldanǵan sharalar kesheni Qazaqstanǵa Zań ústemdiginiń halyqaralyq reıtıngisinde 128 memlekettiń ishinde 62-oryndy alýǵa múmkindik bergenin atap ótti. Dúnıejúzilik Banktiń Sybaılas jemqorlyqty baqylaý ındıkatory boıynsha Qazaqstan 2 jyl ishinde óz kórsetkishterin 2 eseden astamǵa jaqsartty.
Sonymen qatar, 8 jyl ishinde Qazaqstan Sybaılas jemqorlyqty qabyldaý ındeksindegi (Transparency International) pozıtsııasyn 133-ten 94-orynǵa deıin jaqsartty.
Іs-sharaǵa qatysýshylar sybaılas jemqorlyqqa qarsy zańnamany jetildirý, qylmystyq sot isin júrgizý jáne memlekettik qyzmetter kórsetý salalarynda tsıfrlyq tehnologııalardy qoldaný, sondaı-aq qylmystyq protsestiń úsh býyndy modelin engizý boıynsha Qazaqstannyń tájirıbesin oń atap ótti.
Sapar aıasynda M. Ahmetjanovtyń Ózbekstan men Tájikstannyń sybaılas jemqorlyqqa qarsy organdarynyń basshylarymen ekijaqty kezdesýleri ótti.
Ózbekstan Respýblıkasynyń Sybaılas jemqorlyqqa qarsy is-qımyl agenttigimen ózara túsinistik týraly Memorandýmǵa qol qoıyldy.
