Qazaqstan men Ózbekstannyń jemqorlyqqa qarsy vedomstvolary memorandým jasasty

NUR-SULTAN. QazAqparat - 23-24 jeltoqsanda Ózbekstan Respýblıkasynyń Sybaılas jemqorlyqqa qarsy is-qımyl agenttigi dırektorynyń orynbasary T.S. Haıdarov bastaǵan delegatsııa eki eldiń sybaılas jemqorlyqqa qarsy vedomstvolary arasynda memorandýmǵa qol qoıý úshin Qazaqstanǵa is-saparmen keldi.

Kezdesý barysynda Sybaılas jemqorlyqqa qarsy qyzmet basshysy Marat Ahmetjanov elimizdiń sybaılas jemqorlyqqa qarsy saıasaty týraly qysqasha aıtyp berdi.

TMD sybaılas jemqorlyqqa qarsy is-qımyl jónindegi Memleketaralyq Keńestiń tóraǵasy retinde áriptesterin kelesi otyrysqa qatysýǵa jáne qosylý múmkindigin qarastyrýǵa shaqyrdy.

Osydan keıin jumys deńgeıinde tájirıbe almasý boıynsha sessııalar ótkizildi.

Sybaılas jemqorlyq úshin ákimshilik jaýapkershilik, memlekettik satyp alý júıesi, kirister men múlikti deklaratsııalaý, NQA jobalaryna sybaılas jemqorlyqqa qarsy saraptama máseleleri sheteldik áriptesterdiń erekshe qyzyǵýshylyǵyn týdyrdy.

Sondaı-aq, delegatsııa Halyqqa qyzmet kórsetý ortalyqtarynda, Nur-Sultan qalasy ákimdiginiń ahýal ortalyǵynda, Saryarqa aýdany ákimdiginiń servıstik ortalyǵynda jáne Antikor ortalygy-nda boldy.

Bul delegatsııa múshelerine sybaılas jemqorlyq táýekelderin azaıtatyn qyzmetterdi kórsetý jáne alý protsesterimen egjeı-tegjeıli tanysýǵa múmkindik berdi.

Sonymen qatar, ózbek áriptester Bas prokýratýra men Іshki ister mınıstrliginiń ókilderimen kezdesti.

Quqyqtyq statıstıka jáne arnaıy esepke alý komıtetiniń alańynda qylmystyq protsesti avtomattandyrýdy qamtamasyz etetin júıeler tanystyryldy.

Taraptar ózara tıimdi, onyń ishinde onlaın rejımde semınarlar uıymdastyrý arqyly yntymaqtastyqty damytýǵa nıetti ekendikterin bildirdi.