Qazaqstan men Ózbekstannyń vıtse-premerleri Shymkentte «Halyqaralyq bilim kórmesine» qatysty
Kórmege álemniń 40-tan astam memleketinen 200-ge jýyq joǵarǵy oqý oryndary qatysýda. Shymkenttegi kórme jumysyn Qazaqstan Respýblıkasy premer-mınıstriniń birinshi orynbasary Asqar Mamın jáne Ózbekstan Respýblıkasy premer-mınıstriniń birinshi orynbasary Achılbaı Ramatov tamashalady.
«Jalpy kórmege 40 elden kelgen 200-ge tarta ýnıversıtet ókilderi qatysyp jatyr. Al, Shymkent qalasyndaǵy kórmege 96 joǵarǵy oqý ornynan kelgen 150 sheteldik ókilder qatysýda. Sonymen qatar bul ýnıversıtetterdiń 60% qazaqstandyq azamattar úshin tegin turatyn oryn men stıpendııa berýge daıyn. Keıbir joǵary oqý oryndary bir jyldyq til úırený kýrstarynan ótý múmkindikterin beredi», - dedi «Halyqaralyq baǵdarlamalar ortalyǵy» AQ prezıdenti Janbolat Meldeshov.
Kórme aıasynda bilim berý salasyndaǵy sheteldik sarapshylardyń qatysýymen semınarlar men dóńgelek ústelder ótkizý josparlanýda. Sondaı-aq, kórme qatysýshylary úshin ýájdemelik hattardy jáne halyqaralyq testileýlerdi jazý boıynsha tájirıbelik master-klastar ótkiziletin bolady.
Іs-sharaǵa AQSh, Ulybrıtanııa, Sıngapýr, Japonııa, Shveıtsarııa, Polsha, Vengrııa, Ispanııa, Lıtva, Ońtústik Koreıa, Qytaı jáne t.b. eýropalyq standarttary boıynsha bilim beretin joǵary oqý oryndary qatysady.
Sondaı-aq, kórmege jalpy tegin bilim beretin Fınlıandııa, Chehııa, Germanııa, Frantsııa elderiniń joǵary oqý oryndary qatyspaq. Atalǵan elderge tegin oqýǵa túsý úshin tek qujat jınap, konkýrstyq irikteýden ótý qajet, bul jumysta Halyqaralyq baǵdarlamalar ortalyǵy talapkerlerge kómek kórsetýge daıyn.
Kórmeniń negizgi maqsaty Qazaqstan azamattarynyń shetelde tegin bilim alý múmkindikteri týraly aqparattandyrý jáne otandyq joǵary oqý oryndary men sheteldik ýnıversıtetterdiń arasyndaǵy yntymaqtastyqty keńeıtý bolyp tabylady.
Shymkentte vıtse-premerler kórmege kelgen oqý oryndarynyń usynystarymen tanysyp, sonymen qatar, kórmege qatysýshylardyń biri bolyp tabylatyn AQSh-tyń Kolorado shatytynyń Fort Kollıns qalasynyń meri Wade O. Troxell myrzamen tanysty.
«Bul Qazaqstan men Ózbekstan jastarynyń Eýropanyń sapaly oqý oryndarynda bilim alýlary úshin jasalǵan jaqsy múmkindik», - dep atap ótti Asqar Mamın óziniń Ózbekstandyq áriptesi Achılbaı Ramatovpen áńgimesinde.
Elbasy Nursultan Nazarbaev ta biz Qazaqstan úshin eń tıimdi dúnıelerdi alyp kelip, álemniń eń úzdik ýnıversıtetterinen bilim ala otyryp dıplom kýltinen bilim kýltine aýysýymyz qajettigi jaıynda aıtqan bolatyn.
Kórmemen tanystyrý barysynda «Halyqaralyq baǵdarlamalar ortalyǵy» AQ prezıdenti Janbolat Meldeshov: «Bizdiń negizgi maqsattarymyzdyń biri Qazaqstandy Ortalyq Azııadaǵy «bilim haby» qylý desek, aldymen óz joǵarǵy oqý oryndarymyzdy belgili bir dárejede álemdik deńgeıdegi ýnıversıtettermen qatar tura alatyndaı etip daıarlap shyǵarý. Mine, osyǵan baılanysty, ótkizilgeli otyrǵan «Halyqaralyq bilim kórmesinde» elimizdiń ýnıversıtetteri sheteldik mamandardan tegin master klastar alýdy uıymdastyryp otyrmyz. Olardyń eń jaqsy degen modýlderi men jetken jetistikterinen ózimizge qajettilerin úırenýimiz qajet», - dep atap ótti.
Sondaı-aq, kórmege qatysýshy álemniń eń myqty ýnıversıtetteriniń ókilderi jańadan qurylǵan Túrkistan oblysy úshin qajetti barlyq mamandardy qamtamasyz etip berýge daıyn ekendikterin bildirdi.