Qazaqstan men Ózbekstannyń vıtse-premerleri COVID-19-ǵa qatysty birlesken sharalardy talqylady
TAShKENT. QazAqparat - Búgin Tashkent qalasynda Qazaqstan Respýblıkasy Premer-Mınıstriniń orynbasary Eraly Toǵjanov bastaǵan QR delegatsııasy Ózbekstan Respýblıkasy Premer-Mınıstriniń orynbasary Behzod Mýsaevpen kezdesý ótkizdi, dep habarlaıdy QazAqparat primeminister.kz-ke silteme jasap.
Taraptar Qazaqstan men Ózbekstannyń qazirgi epıdemıologııalyq ahýalyn, koronavırýs ınfektsııasynyń taralýyna jol bermeý jónindegi birlesken sharalardy talqylady.
Sondaı-aq taraptar kezdesý barysynda qabyldanǵan barlyq sheshimder ózara tıimdi seriktestiktiń odan ári damýyna serpin berip, baýyrlas Qazaqstan men Ózbekstan halyqtarynyń ál-aýqatyn jaqsartýǵa úles qosatyndaryna senimderin bildirdi.
E. Toǵjanov búkil álemdi sharpyǵan COVID-19 pandemııasy eki eldiń arasyndaǵy ózara is-qımyl men ózara qoldaýynyń qajettiligin taǵy bir ret kórsetti dep basa aıtty.
B. Mýsaev epıdemıologııalyq ahýalǵa der kezinde den qoıý, halyqqa PTR-testileýi men dárilik zattardyń qoljetimdiligin qamtamasyz etý, jańa aýrýhanalar salý máselelerinde Qazaqstan basshylyǵynyń jedeldiginiń joǵary deńgeıin atap ótti. Ózbekstan Premer-Mınıstriniń orynbasary koronavırýs ınfektsııasynyń taralýyna qarsy turýǵa yqpal etetin aqparattyq tehnologııalardy engizýdiń nátıjesin erekshe atap ótti.
Ózbekstan Úkimetiniń ókilderi qazirgi epıdemıologııalyq ahýal týraly únemi aqparat almasý túrinde densaýlyq saqtaý salasyndaǵy seriktestikti jandandyrýǵa daıyn ekendikterin bildirdi.
Budan ári eki eldiń vıtse-premerleri farmatsevtıkalyq ónerkásip salasyndaǵy birlesken jobalardy, onyń ishinde Qazaqstan aýmaǵynda dárilik jáne gıgıenalyq zattardy shyǵaratyn zaýyt salý, Ózbekstanda farmatsevtıkalyq ónimder shyǵaratyn kásiporyndar qurý máselelerin talqylady.
Pandemııa jaǵdaıynda vaktsınatsııa máselesi asa mańyzdy bolyp tabylady. Qazaqstandyq delegatsııa QazCovid-in ınaktıvatsııalanǵan vaktsınasynyń klınıkalyq zertteýleriniń I jáne II fazalarynyń aralyq nátıjelerin málimdedi. Birinshi jáne ekinshi kezeńderdiń nátıjeleri joǵary tıimdilikti kórsetti. Qazirgi ýaqytta 3 000 adamdy qamtıtyn klınıkalyq zertteýlerdiń úshinshi kezeńi júrip jatyr.
Kezdesý barysynda E.Toǵjanov eki eldiń densaýlyq saqtaý mınıstrlikteri arasyndaǵy Kelisimdi ázirleý jáne qol qoıý týraly usynys jasady. Vıtse-premerdiń aıtýynsha, bul qadam densaýlyq saqtaý salasy, onyń ishinde tsıfrlyq tehnologııalar men zııatkerlik júıelerdi, medıtsınalyq bilim men ǵylymdy, farmatsııany, memlekettik-jekemenshik áriptestikti jáne basqa da salalardy damytýǵa jańa múmkindikter beredi.
Eki kúndik sapar aıasynda qazaqstandyq delegatsııa birqatar medıtsınalyq ortalyqtar men farmatsevtıkalyq kásiporyndarǵa, sondaı-aq Tashkent medıtsınalyq akademııasyna barady.
Óz kezeginde E. Toǵjanov ózbek áriptesterin Qazaqstannyń jetekshi medıtsınalyq ortalyqtarynyń jumysymen tanysý úshin elge arnaıy saparmen kelýge shaqyrdy. Behzod Mýsaev shaqyrtýǵa alǵys bildirip, densaýlyq saqtaý jáne bilim berý salasyndaǵy tájirıbelerimen jáne jetistikterimen odan ári almasýǵa daıyn ekenin bildirdi.
