Qazaqstan men Ózbekstannyń vıtse-premerleri birlesken jobalardyń oryndalýyn tekserdi

ASTANA. QazAqparat - QR Premer-Mınıstriniń orynbasary – saýda jáne ıntegratsııa mınıstri Serik Jumanǵarın men ÓR Premer-Mınıstriniń orynbasary Jamshıd Hodjaev Qazaqstan Prezıdentiniń jeltoqsandaǵy Ózbekstanǵa sapary aıasynda qol qoıylǵan ınvestıtsııalyq kelisimder men saýda kelisim-sharttaryn iske asyrýdy talqylady, dep habarlaıdy primeminister.kz.

Taraptar birqatar jobanyń oryndalý barysy qanaǵattandyrtyny týraly atap ótti. Máselen, Tashkent oblysynda mýltımodaldy logıstıkalyq ortalyqtyń qurylysy boıynsha tehnıkalyq-ekonomıkalyq negizdemeni ázirleýge shart jasaldy, naýryz aıynyń basynda jobalaý-smetalyq qujattamany ázirleýge shartqa qol qoıý josparlanýda. Jobany iske asyrýdyń 2026 jylǵa deıingi birinshi kezeńi $70 mln kóleminde ınvestıtsııa tartýdy kózdeıdi.

Taǵy bir perspektıvti birlesken joba – Qazaqstan men Ózbekstan shekarasynda «Ortalyq Azııa» halyqaralyq ónerkásiptik yntymaqtastyq ortalyǵyn qurý. Qańtar aıynyń sońynda taraptar HÓKO-nyń ornalasqan jerin aldyn ala kelisip, nysandy «Atameken» (Qazaqstan) jáne «Gúlstan» (Ózbekstan) halyqaralyq ótkizý beketteriniń aımaǵynda salý boljanyp otyr. Ýaǵdalastyqtardy jaqyn arada bekitý josparlanyp otyr.

«Investıtsııalyq kelisimge qol qoıýdy jedeldetetin bolamyz. Jobaǵa eleýli qyzyǵýshylyq kútilýde», — dedi Serik Jumanǵarın kooperatsııalyq jobalardyń iske asyrylý barysyna monıtorıng júrgizý jáne ımportty almastyrý boıynsha júıeli jumys júrgizý jónindegi jumys tobynyń birinshi otyrysyna qatysýshylarǵa.

QR vıtse-premeri ózbek seriktesterine Qyrǵyzstanmen shekarada osyndaı saýda-logıstıkalyq hab salý týraly aıtyp, Ózbekstannan kelgen ınvestorlar men kásipkerlerdi osy jobaǵa qatysýǵa shaqyrdy.

Óz kezeginde Ózbekstan Premer-Mınıstriniń orynbasary Jamshıd Hodjaev ony birlesip iske asyrýǵa qyzyǵýshylyq bildirdi.

Sondaı-aq kezdesýde taraptar almastyrylatyn ónimdi júıeli jetkizýdi uıymdastyrý úshin birlesken syrtqy saýda kompanııasyn qurý tujyrymdamasyn bekitti. Jumys tobynyń qatysýshylary energetıka, kólik, aýyl sharýashylyǵy, elektrotehnıka ónerkásibi jáne mashına jasaý, ınfraqurylymdyq qurylys, farmatsevtıka, hımııa salalary salasyndaǵy kooperatsııalyq jáne ınvestıtsııalyq jobalardyń oryndalýyn qarastyrdy. Іske asyrý barysynda olardyń keıbireýleri ózgerister engizýdi talap etti.

Kooperatsııalyq jobalardyń iske asyrylý barysyna monıtorıng júrgizý jáne ımportty almastyrý boıynsha júıeli jumys júrgizý jónindegi qazaq-ózbek jumys tobynyń kelesi otyrysy 2023 jylǵy naýryzda Shymkentte ótedi.