Qazaqstan men Ózbekstannyń tuńǵysh óńiraralyq yntymaqtastyq forýmy ótedi
ASTANA. QazAqparat - 16 qarasha kúni Shymkent qalasynda Qazaqstan men Ózbekstan arasyndaǵy tuńǵysh óńiraralyq yntymaqtastyq forýmy ótedi, dep habarlaıdy QazAqparat tilshisi.
Bul týraly QR SІM-de ótken aptalyq brıfıngte vedomstvonyń resmı ókili Aıbek Smadııarov málimdedi.
"2017 jyly naýryzda Ózbekstan Prezıdenti Shavkat Mırzıeevtiń Qazaqstanǵa jasaǵan memlekettik saparynda Memleket basshylary Qazaqstan men Ózbekstan arasyndaǵy óńiraralyq yntymaqtastyq forýmyn ótkizýge ýaǵdalasqan edi. Alǵashqy forýmdy eki eldiń úkimet basshylarynyń birinshi orynbasarlary deńgeıinde ótkizý sheshimi qabyldandy", - dedi Aıbek Smadııarov.
Qazaqstan delegatsııasyn Premer-Mınıstrdiń birinshi orynbasary Asqar Mamın, Ózbekstan tarapynan - Premer-Mınıstrdiń birinshi orynbasary Achılbaı Ramatov basqarady.
"Forým «Ónerkásiptik yntymaqtastyq» taqyrybynda ótedi jáne onyń negizgi maqsaty - eki eldiń óńirleri arasyndaǵy saýda-ekonomıkalyq jáne ınvestıtsııalyq yntymaqtastyqty tereńdetý. Sonyń ishinde, Qazaqstan men Ózbekstannyń isker toptary men óńirleri arasyndaǵy ózara tıimdi yntymaqtastyqty ornatý, ekonomıkanyń shıkizattyq emes sektorlarda ekijaqty yntymaqtastyqty damytý, óńiraralyq jáne transshekaralyq ınvestıtsııalar kólemin ulǵaıtý, ózara saýdadaǵy kedergilerdi joıý jáne quqyqtyq bazany jetildirý", - dedi resmı ókil.
