Qazaqstan men Ózbekstannyń taýar aınalymy qarqyndy damýda- Qarjy mınıstri

ASTANA. QazAqparat - Búgin Senattyń jalpy otyrysynda «1996 jylǵy 12 maýsymdaǵy Tabys pen múlikke qosarlanǵan salyqty boldyrmaý týraly Qazaqstan Úkimeti men Ózbekstan Úkimeti arasyndaǵy kelisimge ózgerister men tolyqtyrýlar engizý jónindegi eki el arasyndaǵy hattamany ratıfıkatsııalaý týraly» Zańyn qabyldady, dep habarlaıdy QazAqparat.

«Birinshiden, aldaǵy ýaqytta salyqtyń barlyq túrleri boıynsha aqparat almasýdy qalyptastyryp, salyq qyzmetteri arasyndaǵy yntymaqtastyqty odan ári nyǵaıtý kózdelgen. Ekinshiden, eki eldiń ishki zańnamasynda qarastyrylǵan salyq tóleýden jaltarýǵa qarsy sharalardy qoldaný jáne zańdy tulǵalardyń qosarlanǵan rezıdenttik problemalaryn sheshý eskerilgen. Úshinshiden, keıbir qyzmet túrlerin iske asyrǵan kezde olardyń tabystaryna birinshi kúnnen bastap salyq salý qarastyrylǵan», - dedi Qarjy mınıstri Baqyt Sultanov.

Onyń sózine qaraǵanda, eki el arasynda taýar aınalymy sońǵy jyldary jaqsy qarqynmen damyp kele jatyr. Atap aıtsaq, tek qana ótken jyldyń qorytyndysy boıynsha taýar aınalymy 2 mlrd AQSh dollaryn qurady. 2016 jylmen salystyrǵanda 31,2 paıyzǵa ósti. Al bıylǵy jartyjyldyqty alatyn bolsaq, taýar aınalymy 1,2 mlrd AQSh dollaryna jetip, byltyrǵy sáıkes merzimimen salystyrǵanda 35 paıyzǵa artty.

Qazaqstan eksportynyń negizgi kórsetkishteri bıdaı men undy, rýdalardy, myrysh kontsentratyn qamtıdy. Al ımport qurlymynda tabıǵı gaz, kókónister men jemister basymdyqqa ıe.