Qazaqstan men Ózbekstannyń Syrtqy ister mınıstrleri kezdesti
SAMARQAND. QazAqparat - Aýǵanstannyń qatysýymen ótken «Úndistan - Ortalyq Azııa» dıalogy mınıstrlerdiń birinshi kezdesýi aıasynda Qazaqstan men Ózbekstan syrtqy ister mınıstrleriniń kezdesýi ótti, dep habarlaıdy QazAqparattyń Ózbekstandaǵy menshikti tilshisi.
ÓR syrtqy saıası vedomstvosy baspasóz qyzmetiniń deregi boıynsha, mınıstrler byltyr Qazaqstan men Ózbekstan prezıdentteriniń Astanada, Samarqandta jáne Saryaǵashta, sondaı-aq halyqaralyq uıymdardyń «alańynda» ótkizgen kezdesýleri Qazaqstan-Ózbekstan qarym-qatynasyna jańa serpin bergenin atap ótti.
2018 jyoy Úkimetaralyq komıssııa, Іskerlik keńesi otyrystarynda, birinshi aımaqaralyq yntymaqtastyq forýmynda jáne basqa da mańyzdy birlesken is-sharalarda ótken kezdesýler ekijaqty yntymaqtastyqty nyǵaıtýǵa múmkindik bergen. Sondaı-aq, ÓR SІM-de Ózbekstan men Qazaqstannyń saýda-ekonomıka, ınvestıtsııalar, kólik-kommýnıkatsııalar salalaryndaǵy ózara árekettestikti keńeıtý úshin mańyzdy áleýetke ıe ekenin atap ótti. Buǵan byltyr 11 aıda ózara saýda-sattyq kóleminiń 38%-ǵa artyp, 2,6 mlrd dollardan asqany dálel bola alady.
Budan bólek, kelissózderde jaqyn arada Tashkentte ótetin Ortalyq Azııa memleket basshylarynyń Konsýltatıvtik kezdesýi men oǵan Qazaqstan delegatsııasynyń qatysýy týraly aıtyldy.
Taraptar turaqtylyq pen turaqty damýdy qamtamasyz etýge baǵyttalǵan ekijaqty jáne aımaqtyq máseleler, týrızm, mádenı-gýmanıtarlyq salalardaǵy yntymaqtastyqty odan ári tereńdetý máselelerin talqylady. Mınıstrler Qazaqstandaǵy Ózbekstan jylyn qorytyndylap, 2019 jyly Ózbekstandaǵy Qazaqstan jylyna daıyndyq týraly pikir almasty.
Avtor: Mıras Qýandyqov
