Qazaqstan men Ózbekstannyń ortaq ustanymy aımaqtyq ıntegratsııaǵa oń áser etedi — sarapshy
TAShKENT. KAZINFORM — Resmı Astana men Tashkenttiń bolashaqqa qatysty ortaq ustanymy Ortalyq Azııadaǵy ıntegratsııaǵa oń áser etedi. Mundaı pikirdi Prezıdent Qasym-Jomart Toqaevtyń Ózbekstanǵa memlekettik sapary qarsańynda Kazinform tilshisine suhbat bergen belgili ózbekstandyq saıasattanýshy Farhod Tolıpov bildirdi.
— Qazaqstan men Ózbekstannyń qazirgi qarym-qatynasy strategııalyq sıpatqa ıe. Birneshe jyl buryn bul baılanystar odaqtastyq deńgeıine shyqty. Qasym-Jomart Toqaevtyń Hıýaǵa jasaǵan keıingi beıresmı sapary barysynda prezıdentter birlesken málimdeme jasady. Onda memleket basshylary strategııalyq, odaqtastyq qarym-qatynaspen qatar, qazaq-ózbek yntymaqtastyǵy, saıası baılanystar endi ekijaqty tandem formatynda damıtynyn aıtty. Bul ózara senimniń joǵary deńgeıde ekenin ańǵartady, — dep pikir bildirdi Farhod Tolıpov Kazinform tilshisine suhbat bere otyryp.
Sarapshynyń sózinshe, Qazaqstan men Ózbekstan yqpaldastyǵy óńirdegi ıntegratsııa úrdisin júıeli júrgizýge yqpal etedi.
— Analıtıkter 90-shy jyldardan bastap óńirdegi eń negizgi memleketter — Qazaqstan men Ózbekstannyń jaqyndasýy aımaqtaǵy ıntegratsııanyń ólshemi ekenin aıtyp keledi. Bul qos el arasynda qabyldanǵan deklaratsııada da jazylǵan. Resmı Astana men Tashkenttiń bolashaqqa qatysty ortaq ustanymy Ortalyq Azııadaǵy ıntegratsııaǵa tikeleı ári oń áser etedi, — dedi Farhod Tolıpov.
Saıasattanýshy atap ótkendeı, Qasym-Jomart Toqaevtyń Ózbekstanǵa memlekettik sapary eki arasyndaǵy yntymaqtasty tereńdetýge baǵyttalǵan taǵy bir mańyzdy qadam bolmaq.
— Meniń oıymsha, sapar aıasynda strategııalyq seriktestik pen odaqtastyq baılanystardy bekemdeı túsetin mańyzdy qujattar qabyldanady. Qasym-Jomart Toqaevtyń Ózbekstanǵa memlekettik sapary Ortalyq Azııa memleketteri basshylarynyń VII Konsýltatıvtik kezdesýi qarsańynda ótedi. Tıisinshe, prezıdentter osy is-sharanyń kún tártibin birlese aqyldasýy da yqtımal, — dep túıindedi F.Tolıpov.
Eske salaıyq, 14-15 qarasha kúnderi Qasym-Jomart Toqaev Ózbekstan Prezıdenti Shavkat Mırzıeevtiń shaqyrýymen Tashkentke memlekettik saparmen keletini habarlandy. Memleketter basshylary shaǵyn jáne keńeıtilgen quramda kelissóz júrgizedi, sondaı-aq prezıdentterdiń tóraǵalyǵymen Qazaqstan-Ózbekstan Joǵary memleketaralyq keńesiniń ekinshi otyrysy ótedi.
Al 16 qarashada Prezıdent Tashkentte ótetin Ortalyq Azııa jáne Ázerbaıjan memleketteri basshylarynyń VII Konsýltatıvtik kezdesýine qatysady.