Qazaqstan men Ózbekstannyń ádebıet salasyndaǵy baılanysy nyǵaıyp keledi
TAShKENT. KAZINFORM – Ózbekstan astanasynda aqyn, kompozıtor, Qazaqstan Jazýshylar odaǵynyń múshesi Tóleýjan Ǵumarovtyń «Altyn besik» atty kitabynyń tusaýkeseri ótti, dep habarlaıdy Kazinform agenttiginiń menshikti tilshisi.
Tusaýkeser saltanaty Nızamı atyndaǵy Ózbekstan ulttyq pedagogıkalyq ýnıversıtetiniń ǵımaratynda ótti. Oǵan Ózbekstandaǵy qazaq qalamgerleri, stýdentter men jergilikti qazaqtar qatysty.
«Altyn besik» kitaby qazaq-ózbek tilderinde jaryq kórip otyr. Túpnusqanyń avtory Tóleýjan Ǵumarov bolsa, týyndyny ózbek tiline Robııa Dýstanova aýdarǵan.
- «Altyn besik» - meniń tórtinshi kitabym. Almaty oblysy ákimdiginiń qoldaýymen jyl saıyn shyǵatyn týyndylar serııasy bar. Sonyń negizinde meniń de eńbegim jaryq kórdi. «Altyn besik» kitaby balabaqsha, mektep balalaryna arnalǵan tanymdyq oqýlyq. QR Mádenıet jáne aqparat mınıstrliginiń qazaq-ózbek qarym-qatynasyn, onyń ishinde ádebı baılanystardy nyǵaıtý bastamasy bar. Tıisinshe, kitapty ózbek tiline aýdarý atalǵan joba aıasynda qolǵa alyndy. Osy rette aýdarmashy Robııa Dýstanovaǵa alǵys bildiremin, - dedi kitap avtory Tóleýjan Ǵumarov.
1000 tırajben basylyp shyqqan kitapta qazaqtyń salt-dástúri, yrymdary men tyıym sózderi qamtylǵan. Eńbek balanyń sanasyna qonymdy tilmen, ıaǵnı tez jattalatyn qysqa óleń shýmaqtarymen jazylǵan.
- Bıyl jaryq kórgen «Altyn besik» týyndysyn qazaq halqynyń salt-dástúrin, turmys-tirshiligin poezııa tilimen tanystyratyn tárbıelik máni joǵary jyr jınaq retinde baǵalaýǵa bolady. Jınaqtaǵy óleńder bala tiline jatyq ári kórkem stılde jazylǵan. Ondaǵy óleńder arqyly jas urpaq ata-baba jolyn tanyp, ulttyq tárbıe men bilimge bet alady. Mundaı eńbekterdi jaryqqa shyǵarý – Qazaqstan men Ózbekstan arasyndaǵy mádenı, ádebı baılanystarynyń nyǵaıyp kele jatqanyn aıǵaqtaıdy, - dep toqtaldy Ózbekstan Jazýshylar odaǵyna qarasty Qazaq ádebıeti keńesiniń tóraǵasy Tursynáli Ahmetov.
Eske salaıyq, byltyr Ózbekstandaǵy qazaq qalamgerleriniń 20-ǵa jýyq kitaby jaryqqa shyqty. Onyń ishinde Abdýlla Rústemovtiń «Qaıran dúnıe», Saparbek Imanbekovtiń «Dostarymyz jyrlaıdy», Jarasqan Myrzamuratovtyń «Aqıqattyń dámi aşy» jáne Lola Júnisqyzynyń «Qarasý jyrlary» atty eńbekteri bar.
Qosa ketsek, buǵan deıin Qazaqstan men Ózbekstan mádenı baılanystardy nyǵaıtýǵa múddeli ekenin jazyp edik.