Qazaqstan men Ózbekstanǵa kelgen týrıster úshin ortaq vıza jasalmaq
ASTANA. QazAqparat - Qazaqstan men Ózbekstan aldaǵy ýaqytta týrıster úshin ortaq vıza shyǵarýdy kózdeýde. Bul týraly Astanada ótken Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda tilshilermen tildesken QR Mádenıet jáne sport mınıstri Arystanbek Muhamedıuly aıtyp berdi, dep habarlaıdy «QazAqparat» HAA tilshisi.
«Qazirgi ýaqytta bizdiń memleketter vıza týraly kelisip jatyr. Demek, Ózbekstan aýmaǵyndaǵy týrıster úshin beriletin vıza Qazaqstanda da jaramdy bolar edi. Bul bylaısha aıtqanda ortaq vıza bolady. Qazaqstanǵa kelgen sheteldik meımandar (sol vızamen - avt.) Ózbekstanǵa da bara alar edi», - dedi mınıstr.
Arystanbek Muhamedıulynyń aıtýynsha, atalǵan kelisimge eki eldiń Syrtyq ister mınıstrlikteriniń qurylymdarymen týrıstik yntymaqtastyq turǵysynda qol qoıylǵan.
«Búgingi komıssııa otyrysynyń sońynda osy ýaǵdalastyq aıasynda kelisimge qol qoıyp, Úkimetke qaýly usynamyz. Álbette, ýaqyt ótip bara jatqandyqtan, biz bul protsessti tezdetýimiz kerek», - dedi mınıstr.
Eske sala ketsek, búgin Astanada ótken Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda Qazaqstan men Ózbekstan tarapy birqatar ekijaqty kelisimderge qol qoıǵan bolatyn.
