Qazaqstan men Ózbekstandy baılanystyratyn jańa temirjol jelisi salynyp jatyr

Qazaqstan men Ózbekstandy baılanystyratyn jańa temirjol jelisi 2027 jyly paıdalanýǵa berilmek, dep habarlaıdy Kazinform agenttiginiń menshikti tilshisi.

«Qazaqstan temir joly» kompanııasynyń baspasóz qyzmetinen málim etkendeı, jańa temirjol jelisin iske qosý «Saryaǵash» stantsııasynyń júktemesin azaıtýǵa jáne Ózbekstanǵa eksport kólemin arttyrýǵa múmkindik beredi.

— Bul maqsatta «Qazaqstan temir joly» 286 mlrd teńgege ınvestıtsııalyq jobany júzege asyryp jatyr. Darbaza-Maqtaaral jańa jelisi Túrkistan oblysynyń eki shalǵaı aýdanyn, atap aıtqanda Maqtaaral men Jetisaıdy Qazaqstannyń basqa aımaqtarymen baılanystyrýǵa múmkindik beredi. Búgingi tańda 203 shaqyrym joldyń shamamen 100 shaqyrymyna rels-shpaldy tor tóseldi, — delingen «QTJ» kompanııasy taratqan habarlamada.

Jobaǵa 46 tehnıka men 70-ten astam adam jumyldyrylǵan. Kompanııadan atap ótkendeı, qurylys kezeńinde 3 400 ýaqytsha jumys orny qurylady. Al jeli qoldanysqa beriletin 2027 jyly 500-den astam turǵyn turaqty jumyspen qamtylady.

Eske salaıyq, 2024 jyldyń 11 aıynda Qazaqstan men Ózbekstan arasyndaǵy taýar aınalymy $3,8 mlrd asty.