Qazaqstan men Ózbekstan jumysshy mıgranttardyń quqyǵyn birge qorǵaıdy

NUR-SULTAN. QazAqparat - QR Eńbek jáne halyqty áleýmettik qorǵaý mınıstri Berdibek Saparbaev HІІ Astana ekonomıkalyq forýmy aıasynda ótken Halyqaralyq eńbek uıymynyń 100 jyldyǵyna arnalǵan halyqaralyq konferentsııada birqatar ekijaqty kezdesý ótkizdi, dep habarlaıdy QazAqparat tilshisi.

Atap aıtqanda, Ózbekstan Respýblıkasynyń Jumyspen qamtý jáne eńbek qatynastary mınıstri Sherzod Qudbıevpen kezdesý barysynda Qazaqstanmen Ózbekstan úkimetteri arasyndaǵy jumysshy mıgranttardyń eńbek qyzmeti men quqyqtaryn qorǵaý týraly 2019 jyldan 2020 jylǵa deıingi kezeńge arnalǵan kelisimdi iske asyrý jónindegi birlesken is-sharalar josparyna (jol kartasy) qol qoıyldy.

Bul úkimetaralyq kelisimdi vedomstvo basshylary 2019 jyly 15 sáýirde Tashkent qalasynda QR Prezıdenti Qasym-Jomart Toqaevtyń memlekettik sapary aıasynda rásimdelgen edi.

Úkimetaralyq kelisim aıasynda jumysshy mıgranttar qabyldaýshy memlekettiń zańnamasyna jáne eńbek shartynyń talaptaryna sáıkes basqa adamdar úshin qaýipti aýrýlarǵa arnalǵan tegin medıtsınalyq kómektiń kepildik berilgen kólemin alý quqyǵyna ıe. Eńbek mıgranttary úshin aqy tóleý jáne basqa da eńbek jaǵdaılary jumys berýshimen qabyldaýshy memlekettiń zańnamasyna sáıkes eńbek shartymen retteledi.

Kezdesý qorytyndysy boıynsha mınıstrler vedomstvolar arasynda ornatylǵan iskerlik jáne dostyq baılanystardy joǵary baǵalaıtynyn jáne qol qoıylǵan halyqaralyq qujat aıasynda odan ári yntymaqtastyqqa daıyn ekenin atap ótti.

Budan basqa, B.Saparbaev Birikken Ulttar Uıymynyń Halyqaralyq áleýmettik qamsyzdandyrý qaýymdastyǵynyń múshelik qyzmetteri men baılanysyn damytý departamentiniń dırektory Grem Mıntonmen kezdesti. Taraptar yntymaqtastyqtyń ózekti máselelerin talqylady. Kezdesý barysynda mınıstr HÁQQ-men yntymaqtastyqtyń mańyzdylyǵyn jáne basym baǵyttar boıynsha yntymaqtastyqty odan ári keńeıtýge múddeli ekenin atap ótti.