Qazaqstan men Ózbekstan Ulttyq ulandary birlesip jattyǵýlar ótkizbek

29 qyrkúıek pen 3 qazan aralyǵynda Іshki ister mınıstriniń orynbasary – Ulttyq ulan Bas qolbasshysy general-leıtenant Rýslan Jaqsylyqov bastaǵan Qazaqstan Respýblıkasy Ulttyq ulan Bas qolbasshylyǵynyń delegatsııasy Ózbekstan Respýblıkasynda issaparmen boldy. Sapar ózbekstandyq taraptyń shaqyrýymen qyzmettik-jaýyngerlik áreket boıynsha tájirıbe almasý jáne ár túrli salada ekijaqty yntymaqtastyqty arttyrý maqsatynda uıymdastyryldy.
Qazaqstandyqtar aldymen Ózbekstan Ulttyq ulanynyń Ortalyq apparatynda bolyp, Qolbasshy general-maıor Rýstam Djýraevpen kezdesti. Júzdesý barysynda birqatar kelisimder boıynsha kelissózder ótkizilip, qujattarǵa qol qoıyldy. Atap aıtqanda, mańyzdy memlekettik nysandar men júkterdi kúzetý, eki el arnaıy maqsattaǵy bólimsheleriniń birikken arnaıy-taktıkalyq jattyǵýlaryn, sondaı-aq, Qazaqstan Ulttyq ulan Áskerı ınstıtýtymen bilim berý baǵdarlamasyn iske asyrý boıynsha tájirıbe almasý máseleleri áńgime arqaýy boldy.

Sapar aıasynda QR Ulttyq ulan delegatsııasy Qoǵamdyq qaýipsizdik ýnıversıtetinde, Arnaıy oqý ornynda, Tashkent qalasynyń kúzetý bólimin, Kavalerııalyq eskadronda jáne taǵy basqa da nysandarda bolyp, qyzmettik-jaýyngerlik árekettiń ár túrli máseleleri boıynsha Ózbekstan Ulttyq ulanynyń tájirıbesimen tanysty. Delegatsııa basshysy general-leıtenant Rýslan Jaqsylyqov yqpaldastyq josparyna qol qoıý kezinde eki jaqty yntymaqtastyqty damytý, nyǵaıtý jáne qoǵamdyq qaýipsizdik máseleleri boıynsha ózara árekettesý ári qaraı jalǵasatynyna senim bildirdi. Taraptar, sondaı-aq Qazaqstan Ulttyq ulany ókilderi kınologtarynyń jeke-komandalyq jarystaryna, baqylaýshy retinde kúreń beret kvalıfıkatsııalyq synaqtaryna qatysýǵa, sonymen qatar taýly jáne arnaıy-taktıkalyq daıyndyq boıynsha Qazaqstan jáne Ózbekstan Ulttyq ulandarynyń arnaıy maqsattaǵy jaýyngerleri arasynda tájirıbelik semınar-jınalysyn ótkizý týraly kelisimge qol jetkizdi.
Budan bólek, Ózbekstan Ulttyq ulanynyń basshylyǵy Qazaqstan polıtsııasynyń 30 jyldyǵyna arnalǵan áskerı-úrmeli orkestrler arasyndaǵy halyqaralyq áskerı-mýzykalyq «Áskerı kerneı – 2022» festıvaline jáne QR Іshki ister mınıstriniń kýboynae arnalǵan jekpe-jek urys boıynsha Halyqaralyq týrnırge qatysýǵa ynta tanytty.