Qazaqstan men Ózbekstan úkimet basshylary yntymaqtastyqty nyǵaıtý qarqynyn talqylady
ALMATY. KAZINFORM — Almatyda Qazaqstan men Ózbekstan premer-mınıstrleri Oljas Bektenov pen Abdýlla Arıpovtiń tóraǵalyǵymen ekijaqty yntymaqtastyq jónindegi birlesken Úkimetaralyq komıssııanyń 21-otyrysy ótti.
Taraptar Ózbekstan Prezıdenti Shavkat Mırzıeevtiń Qazaqstanǵa resmı sapary qarsańynda ekijaqty kún tártibindegi ózekti máseleler boıynsha pikir almasty jáne eki memleket basshylarynyń ýaǵdalastyqtaryn iske asyrý qarqynyn qarastyrdy.
Atap aıtqanda, saýda-ekonomıkalyq, ınvestıtsııalyq, sý-energetıkalyq yntymaqtastyqty, kólik, ónerkásip, aýyl sharýashylyǵy, ekologııa jáne tsıfrlandyrý salasyndaǵy ózara is-qımyldy nyǵaıtýǵa baǵyttalǵan jobalardyń jaı-kúıi talqylandy.
Qazaqstan men Ózbekstanǵa Ortalyq Azııadaǵy barlyq saýdanyń 57%-y tıesili. Ótken jyldyń qorytyndysy boıynsha eki el arasyndaǵy taýar aınalymy $4,5 mlrd qurady, 2024 jyldyń 4 aıynda onyń kólemi $1,2 mlrd-tan asty.
Ónerkásiptik kooperatsııa 14,7 myńnan astam jumys ornyn asha otyryp, $3,1 mlrd somasyna 69 jobany iske asyrýdy kózdeıdi. Búgingi tańda $217 mln somasyna 12 birlesken joba sátti júzege asyrylyp, 4,5 myńǵa jýyq jumys orny ashyldy.
Qazirgi ýaqytta $178 mln-ǵa 3 ınvestıtsııalyq joba iske asyrylýda. Іri jobalardyń biri — Taraz qalasyndaǵy 500 myń tonna bolat ónimin shyǵaratyn elektrometallýrgııa zaýyty.
Qazaqstannyń Túrkistan oblysy men Ózbekstannyń Syrdarııa oblysynyń aýmaqtarynda aýdany 100 ga bolatyn «Ortalyq Azııa» halyqaralyq ónerkásiptik kooperatsııa ortalyǵy qurylysynyń jobasyn iske asyrý birlesken óndirister úshin qosymsha yntalandyrý jaǵdaılaryn jasaýǵa múmkindik beredi.
Mashına jasaý salasynda Qazaqstan men Ózbekstan jyl saıynǵy negizde elektrotehnıkalyq ónimder men akkýmýlıatorlardy ózara jetkizý kólemin ulǵaıtý boıynsha yntymaqtastyqty keńeıtetin bolady.
Júk aınalymyn ulǵaıtýǵa kólik salasyndaǵy ózara baılanystardy keńeıtý, temirjol ınfraqurylymyn damytý jáne «tar jerlerdi» joıý boıynsha qabyldanyp jatqan sharalar yqpal etedi.
Osyǵan baılanysty taraptar «Darbaza — Maqtaaral», Almatynyń aınalma joly, Dostyq stansasy jobalaryn iske asyrýǵa qyzyǵýshylyq bildirdi.
Sý salasynyń eki eldiń tynys-tirshiligine áserin eskere otyryp, yntymaqtastyqty odan ári nyǵaıtý quraldary pysyqtaldy. Atap aıtqanda, eki memleket aýmaǵyndaǵy sý taratý ýchaskelerin tsıfrlandyrý jáne avtomattandyrý boıynsha birlesken qadamdar qaraldy.
«Ózbekstan biz úshin tatý kórshi, odaqtas ári baýyrlas memleket. Bizdiń úkimetterimizdiń aldyna eki eldiń Memleket basshylary orta merzimdi perspektıvada ózara taýar aınalymyn $10 mlrd deıin jetkizý boıynsha aýqymdy mindet qoıdy. Bul baǵytta biz agroónerkásip kesheni men azyq-túlik ónerkásibinde saýdany ulǵaıtýǵa, sondaı-aq ónerkásiptik kooperatsııa deńgeıin arttyrýǵa múddelimiz», — dedi Oljas Bektenov.
Óz kezeginde Abdýlla Arıpov Qazaqstan men Ózbekstan arasyndaǵy qarym-qatynas sońǵy jyldary strategııalyq áriptestik pen odaqtastyq negizde qarqyndy damyp kele jatqanyn atap ótti. Sondaı-aq atalǵan qarym-qatynasty odan ári nyǵaıtý úshin zor áleýet bar.
«Barlyq salada oń ósim baıqalady. Bul bizdiń baýyrlas halqymyzdyń múddelerine tolyq saı keledi. Mundaı joǵary deńgeıdegi áriptestiktiń mańyzdy faktory — eki memlekettiń basshylary arasyndaǵy dostyq pen senimdi qarym-qatynas ekeni sózsiz. Búgingi kezdesý men qol jetkizilgen ýaǵdalastyqtar bizdiń yntymaqtastyǵymyzǵa qosymsha serpin beretinine senimdimin», — dedi Abdýlla Arıpov.
Otyrys qorytyndysy boıynsha ekijaqty yntymaqtastyq jónindegi birlesken Úkimetaralyq komıssııanyń 21-otyrysynyń hattamasyna qol qoıyldy.
