Qazaqstan men Ózbekstan Ýhannan ákelingen qazaqstandyqtardyń jaǵdaıyn birge baqylaıdy

NUR-SULTAN. QazAqparat - QR Densaýlyq saqtaý mınıstri Eljan Birtanov pen Ózbekstan Respýblıkasynyń Densaýlyq saqtaý mınıstri Alısher Shadmanov telefon arqyly sóılesti, dep habarlaıdy QazAqparat vedomstvonyń baspasóz qyzmetine silteme jasap.

Eljan Birtanov óziniń áriptesine Ýhannan qazaqstandyqtardy evakýatsııalaǵany úshin alǵys aıtty.

Taraptar QR Densaýlyq saqtaý mınıstrliginiń jedel ortalyǵy arqyly turaqty baılanys ornatýǵa jáne aqparat almasýǵa kelisti.

Atap aıtqanda, QR Densaýlyq saqtaý mınıstrligi Ózbekstannyń Tashkent qalasyndaǵy (bes qazaqstandyq) Ýhannan evakýatsııalanǵan azamattarymyzdyń jaǵdaıyna birlesip monıtorıng júrgizedi. Jerlesterimiz eki aptalyq karantınde otyr.

Aıta ketý kerek, bul jaǵdaı Densaýlyq saqtaý mınıstrliginiń turaqty baqylaýynda.