Qazaqstan men Ózbekstan turmystyq tehnıka shyǵaratyn kásiporyn ashý týraly kelisimge keldi
TÚRKІSTAN. QazAqparat - Túrkistanda Artel kompanııasy 1 mln-ǵa deıin gaz plıtasyn shyǵarady. Bul týraly Túrkistan oblysynyń ákimi Ómirzaq Shókeevtiń Ózbekstanǵa jasaǵan issaparynda aıtyldy, dep habarlaıdy Túrkistan oblysy ákiminiń baspasóz qyzmeti.
Oblys ákiminiń Tashkent qalasynyń ákimi Djahongır Artykhýdjaevpen ótken kezdesýi barysynda Qazaqstan men Ózbekstan birlesip turmystyq tehnıka shyǵaratyn kásiporyn ashý týraly kelisimge keldi.
Kórshi el ınvestorlary Túrkistannyń ındýstrıaldy aımaǵynda gaz plıtalary men sý jylytqysh qurylǵylaryn óndirmek. Joba aıasynda 2 myńnan astam jańa jumys orny ashylady. Tehnıka baǵasy da tutynýshy úshin qoljetimdi bolmaq. Túrkistan oblysynyń ákimi jobany júzege asyrý barysynda ákimdik tarapynan jan-jaqty qoldaý kórsetiletindigin aıtty.
«Dostyq qatynastarǵa negizdelgen Qazaqstan – Ózbekstan yntymaqtastyqtyǵy nyǵaıa túsýde. Búgingi joba birazdan beri talqylanyp kelgen. Bul birlesken jumystyń basy ǵana. Jalpy, Ózbekstandyq ınvestorlar Túrkistan qalasyna birneshe óndiris ornyn ashýǵa qyzyǵýshylyq bildirip otyr», – dep atap ótti Ómirzaq Shókeev.
Artel kompanııasy Túrkistan oblysynda as úı plıtalaryn, qalyptaý buıymdaryn jáne elektr sý jylytqyshtaryn shyǵaratyn zaýyt salady. Aıta ketý kerek, ótken jyldyń sońynda kompanııa ókilderi Túrkistan qalasyna kelip, óńirdiń ınvestıtsııalyq ahýaly, ekonomıkalyq múmkindikteri jáne ındýstrıaldyq aımaqtaǵy ınvestorlar úshin jasalynǵan múmkindiktermen tanysqan bolatyn.
Sonymen qatar, Ózbekstan eline sapary barysynda oblys ákimi Ómirzaq Shókeev Chınaz aýdanynda bolyp, turǵyndardy jumyspen qamtý maqsatynda boı kótergen toqyma ónimderin shyǵaratyn iri tigin fabrıkasynyń ashylý rásimine qatysty.
Ómirzaq Estaıuly tigin ındýstrııasyn damytyp, shalǵaı jerlerde qajetti jumys oryndaryn quratynyn joba jetekshilerin oblys atynan quttyqtady. «Qojakent Textile» kompanııasy qysqa merzim ishinde úkimetaralyq ónerkásiptik kooperatsııa sheńberinde Túrkistan qalasynda tigin fabrıkasyn iske qosqany belgili.
