Qazaqstan men Ózbekstan týrızm salasyndaǵy yntymaqtastyqty kúsheıtedi
ASTANA. KAZINFORM – Qazaqstan Respýblıkasy Parlamenti Májilisi men Ózbekstan Respýblıkasy Olıı Májlisi arasyndaǵy Parlamentaralyq yntymaqtastyq keńesiniń otyrysynda ózara is-qımyldyń negizgi baǵyttary, sonyń ishinde týrızmdi damytý máseleleri talqylandy. Bul týraly Týrızm jáne sport mınıstrligi habarlady.
Májilis tóraǵasy Erlan Qoshanov Qazaqstan Ózbekstanmen ǵasyrlar boıy qalyptasqan dostyq pen tatý kórshilik qatynastardy nyǵaıtýǵa aıryqsha mán beretinin atap ótti. Sondaı-aq ol kezeginde mádenıet jáne bilim berý salalarymen qatar týrızm baǵytyndaǵy yntymaqtastyqty damytý mańyzdy ekenin aıtty.
Taraptar óńirlik týrızmdi birlesip damytýǵa erekshe nazar aýdardy. 2026-2027 jyldarǵa arnalǵan birlesken is-qımyl jospary ortaq týrıstik keńistik qalyptastyrýǵa jáne sheteldik týrıster aǵynyn arttyrýǵa baǵyttalǵan.
Kazakh Tourism UK AQ Basqarma tóraǵasy Talǵat Ǵazızovtyń aıtýynsha, búginde Qazaqstan men Ózbekstan Ortalyq Azııaǵa keletin týrısterdiń jartysynan kóbin qabyldap otyr. Sonymen qatar transshekaralyq baǵyttarǵa suranys artyp keledi.
Buǵan deıin saýda, týrızm jáne tsıfrlandyrý salasynda Qazaqstan men Ózbekstan yqpaldastyǵy artyp kele jatqanyn jazǵan edik.
