Qazaqstan men Ózbekstan transulttyq uıymdasqan qylmysqa qarsy kúresti nyǵaıtpaq

ASTANA. KAZINFORM — Tashkentte Qazaqstan Respýblıkasy men Ózbekstan Respýblıkasy qaýipsizdik keńesteriniń apparattary arasynda keńeıtilgen konsýltatsııalar ótti, dep habarlaıdy Aqordanyń baspasóz qyzmeti.

Qazaqstan Respýblıkasy Qaýipsizdik Keńesiniń hatshysy Ǵızat Nurdáýletov pen Ózbekstan Respýblıkasy Prezıdenti janyndaǵy Qaýipsizdik Keńesiniń hatshysy Vıktor Mahmýdovtyń tóraǵalyǵymen ótken kelissózder barysynda qaýipsizdikti qamtamasyz etýdiń ózekti máseleleri qaraldy. Jıynǵa quqyq qorǵaý, arnaýly jáne basqa da memlekettik organdar basshylary qatysty.

Taraptar halyqaralyq terrorızm men dinı ekstremızmniń aldyn alý jáne oǵan qarsy turý boıynsha yntymaqtastyqty jandandyrý máselesin talqylady. Sondaı-aq quqyq qorǵaý, sonyń ishinde transulttyq uıymdasqan jáne kıber qylmysqa qarsy kúresti nyǵaıtý isine nazar aýdaryldy.

Konsýltatsııalardyń kún tártibine áskerı jáne áskerı-tehnıkalyq salalardaǵy naqty is-qımyl, tótenshe jaǵdaılar, ásirese, shekara mańyndaǵy oqys oqıǵalardyń aldyn alý jáne shuǵyl áreket etý jónindegi yntymaqtastyqty keńeıtý máseleleri qoıyldy.

Qaýipsizdik keńesteriniń apparattary arasyndaǵy ekijaqty konsýltatsııalar turaqty negizde ótedi.

Buǵan deıin Astanada Qazaqstan men Reseı Qaýipsizdik keńesteriniń apparattary arasynda keńeıtilgen josparly konsýltatsııalar ótkenin jazdyq.