Qazaqstan men Ózbekstan temirjol tasymaly kólemin 60 mln tonnaǵa deıin arttyrýdy kózdep otyr
ASTANA. KAZINFORM – Qazaqstan Respýblıkasy Kólik mınıstri Ózbekstan Respýblıkasynyń Kólik mınıstrimen temirjol tasymaly salasyndaǵy yntymaqtastyqty damytý máseleleri boıynsha kezdesý ótkizdi.
Kezdesý Qazaqstan Respýblıkasynyń Prezıdenti júktegen tranzıttik áleýetti arttyrý jáne tranzıttik tasymal kólemin 55 mln tonnaǵa deıin jetkizý tapsyrmalaryn iske asyrý aıasynda ótti.
Taraptar Qazaqstan men Ózbekstan arasyndaǵy temirjol qatynasynyń strategııalyq mańyzyn atap ótti. Bul baǵyt eki eldiń saýda-ekonomıkalyq baılanystaryn nyǵaıtýda, halyqaralyq tranzıtti damytýda jáne óńirlik kólik ıntegratsııasyn keńeıtýde negizgi ról atqarady. Sonymen qatar tasymal kólemin ulǵaıtý men logıstıkalyq baǵyttardyń tıimdiligin arttyrýda eleýli áleýet bar ekeni aıtyldy.
2025 jyldyń qorytyndysy boıynsha eki el arasyndaǵy temirjol tasymaly kólemi 32,3 mln tonnany qurady. Bul kórsetkish 2024 jylmen salystyrǵanda 16%-ǵa joǵary.
Tasymal kólemin kezeń-kezeńimen arttyrý jáne kelisilgen ótkizý qabileti parametrlerine qol jetkizý maqsatynda taraptar Birlesken is-sharalar josparyn ázirledi. Qujatta Saryaǵash, Oazıs jáne Syrdarııa túıispelerinde ınfraqurylymdy damytý kózdelgen. Atap aıtqanda, Darbaza–Maqtaral ýchaskesin qamtıtyn negizgi jobalardy aıaqtaý josparlanyp otyr.
Qazirgi ýaqytta Saryaǵash túıispesi arqyly táýligine 36 jup poıyz ótedi, jospar boıynsha bul kórsetkishti 40 jupqa deıin jetkizý kózdelgen. Oazıs arqyly táýligine 2 jup poıyz qatynasady, bolashaqta 10 jupqa deıin arttyrý josparlanǵan. Syrdarııa túıispesi arqyly Darbaza–Maqtaral ýchaskesi iske qosylǵannan keıin táýligine 10 jup poıyz ótkizý múmkindigi qarastyrylǵan.
Keńes barysynda ınfraqurylymdyq jáne jóndeý jumystaryn úılestirý, baqylaý rásimderin jetildirý, tehnologııalyq ózara is-qımyldy ońtaılandyrý jáne tasymal protsesiniń tıimdiligin arttyrý máseleleri talqylandy.
Kezdesý qorytyndysy boıynsha taraptar yntymaqtastyqty odan ári keńeıtýge jáne temirjol tasymaly kólemin kezeń-kezeńimen arttyrýǵa ózara múddeliligin rastady.
Aıta keteıik, Qazaqstanda tirkelgen kólikterdiń Ózbekstanda júrý merzimi 6 aıǵa deıin uzartylýy múmkin.