Qazaqstan men Ózbekstan temirjol salasynda ózara birlesken kásiporyn qurmaq

ASTANA. KAZINFORM – Bul týraly búgin Qazaqstan men Ózbekstan Prezıdentteriniń kelissózderi barysynda aıtyldy.

Aqordanyń baspasóz qyzmetiniń habarlaýynsha, kelissóz barysynda memleketter basshylary Ortalyq Azııadaǵy turaqtylyq pen qaýipsizdikti saqtaý máselesine erekshe nazar aýdardy.

Osy rette Ortalyq Azııa memleketteri basshylarynyń kezekti altynshy Konsýltatıvtik kezdesýine daıyndyq barysy, sondaı-aq S5+ formatyndaǵy yqpaldastyq perspektıvalary talqylandy.

Eki el basshylary óńirdegi ózara yntymaqtastyqty nyǵaıtý úshin Qazaqstan men Ózbekstannyń temirjol ákimshilikteri arasynda birlesken kásiporyn qurý týraly bastamaǵa qoldaý bildirdi. Bul birlesken kásiporyndy qurýdaǵy maqsat – Qytaı – Qazaqstan – Ózbekstan baǵytyndaǵy júk tasymalyn uıymdastyrý úshin qazaq-qytaı shekarasyndaǵy jáne Ózbekstandaǵy júk termınaldaryn ózara tıimdi negizde paıdalaný.

Atalǵan joba ekijaqty saýdany jandandyryp, taýar tasymalynyń kólemin arttyrýǵa yqpal etedi, sondaı-aq ońtústik baǵyttaǵy júk tasymalyn ulǵaıtýǵa qolaıly jaǵdaı týǵyzady.

Birlesken kásiporyn Transaýǵan baǵytyn damytýǵa jumyldyrylady.

Osyǵan deıin Memleket basshysynyń Ózbekstan Prezıdenti Shavkat Mırzıeevpen beıresmı kezdesý ótkizgenin habarladyq.