Qazaqstan men Ózbekstan taýar aınalymyn 5 mlrd dollarǵa deıin ulǵaıtady
TAShKENT. QazAqparat - Tashkentte QR Premer-Mınıstriniń birinshi orynbasary Asqar Mamın men Ózbekstan Premer-Mınıstriniń birinshi orynbasary Achılbaı Ramatovtyń qatysýymen Qazaqstan men Ózbekstan arasyndaǵy taýar aınalymyn ulǵaıtý boıynsha jumys tobynyń otyrysy ótti, dep habarlaıdy QazAqparattyń menshikti tilshisi.
Otyrys barysynda eki el arasyndaǵy saýda-kóleminiń ulǵaıǵany atap ótildi. 2018 jyldyń alǵashqy toqsanynda Qazaqstan men Ózbekstan arasyndaǵy syrtqy saýda aınalymy 543,1 mln AQSh dollaryn quraǵan. Bul ótken jylǵy kezeńmen (371,8 mln AQSh dollary) salystyrǵanda 46% kóp.
2018 jyldyń alǵashqy toqsanynda Qazaqstannan Ózbekstanǵa eksport 55,1% artyp, 399,9 mln AQSh dollaryn quraǵan. Ózbekstannan Qazaqstanǵa ımport 25,6% ulǵaıyp, 143 mln AQSh dollary bolǵan.
«Bizdiń birde-bir saýda seriktesimizben mundaı ósim dınamıkasy bolmaǵan, EAEO aıasyndaǵy eń aýqymdy ósimniń ózi 30% bolǵan. Áıtse de, bizde áli de iske qosylýy tıis rezervter bar», - dep atap ótti Asqar Mamın.
Saýda-ekonomıkalyq yntymaqtastyq damýynyń oń ósimin esepke ala otyryp, qos tarap taýar aınalymy ósimin 2018 jyldaǵy 3 mlrd dollardan 2020 jylǵa qaraı 5 mlrd dollarǵa deıin arttyrýǵa ýaǵdalasty.
