Qazaqstan men Ózbekstan sý resýrstaryn ǵaryshtan baqylaý boıynsha birlesken joba ázirleýi yqtımal

TAShKENT. KAZINFORM — Ózbek tarapy 1 gektar jerge qansha sý jumsalatynyn ǵaryshtan baqylap otyr. Bul týraly Kazinform agenttiginiń menshikti tilshisine suhbat bergen «Ózbekosmos» agenttigi dırektorynyń orynbasary Mýhıddın Ibragımov aıtty.

Vedomstvo ókiliniń málimetinshe, búginde Ózbekstanda ǵaryshtyq monıtorıng baǵdarlamasy jumys istep tur. Ol ekologııa, sý jáne orman sharýashylyǵy salalaryn qamtıdy.

— Biz eldegi negizgi 60 sý qoımasyn tsıfrlandyrdyq. Qansha kólemde sý jınalǵanyn, onyń qandaı maqsattarǵa qoldanylyp jatqanyn tolyq baqylaımyz. Tirshilik náriniń basym bóligi aýyl sharýashylyǵy salasyna baǵyttalady. Osy rette agenttik ǵaryshtyq monıtorıng arqyly sýdyń qanshalyqty tıimdi paıdalanylyp jatqanyn, ysyrap bolǵanyn kóre alady. 1 gektar jerge qansha sý jumsalatynyn onlaın rejımde bilip otyramyz. Keıin alynǵan aqparattar taldaýdan ótip, tıisti organdarǵa joldanady, — dep jaýap berdi Mýhıddın Ibragımov Kazinform tilshisiniń saýalyna.

Ol atap ótkendeı, ǵaryshtyq monıtorıng boıynsha ózbek tarapy Qazaqstanmen yntymaqtastyqta jumys isteıdi.

— Búginde «Qazaqstan Ǵarysh Sapary» ulttyq kompanııasy men bizdiń agenttik tyǵyz qarym-qatynasta jumys isteıdi. Biz túrli baǵyttarda aqparat almasamyz. Sonymen qatar qazaqstandyq áriptesterimizdiń qatysýymen óńirlik deńgeıdegi birlesken jobalar ázirleýdi josparlap otyrmyz. Sý sharýashylyǵyna qatysty ǵaryshtyq monıtorıng júrgizý — bizdiń keleshek yntymaqtastyǵymyzdyń bir baǵyty bolatyny anyq, — dep qorytyndylady Mýhıddın Ibragımov.

Eske salaıyq, byltyr Ózbekstan ǵarysh keńistigin zertteýge baǵyttalǵan halyqaralyq shartqa qosylǵan edi.

Buǵan deıin habarlaǵanymyzdaı, Qazaqstan men Ózbekstan ǵarysh salasyndaǵy seriktestikti nyǵaıtýǵa nıetti.