Qazaqstan men Ózbekstan sý resýrstaryn ǵaryshtan baqylaý júıesin engizýdi talqylap jatyr
TAShKENT. KAZINFORM – Qazaqstan men Ózbekstan ǵaryshty ıgerý boıynsha birneshe birlesken jobany iske asyryp jatyr. Bul týraly «Space Technology Conference – 2026» is-sharasyna qatysqan jaýapty vedomstvo ókilderi málim etti, dep habarlaıdy Kazinform agenttiginiń Tashkenttegi menshikti tilshisi.
- Biz Ózbekstanmen uzaq jyldar boıy tyǵyz qarym-qatynasta jumys istep kelemiz. Atap aıtqanda, Jerdi qashyqtan zondtaý jáne GIS baǵyttaryn damytý boıynsha birlesken jobalardy iske asyramyz. Sonymen qatar «Ózbekkosmos» mamandary Qazaqstandaǵy ǵarysh ortalyǵynyń bazasynda taǵylymdamadan ótti. Munymen birge biz sý resýrstaryn ǵaryshtan baqylaý boıynsha biregeı jobany talqyladyq. Bul Qazaqstan, Ózbekstan, Túrikmenstan jáne Qyrǵyzstan úshin de óte mańyzdy. Biz kúsh-jigerimizdi biriktirsek, muzdyqtardyń qandaı jyldamdyqpen erip jatqanyn jáne qaı sý arnalaryn tazartý qajet ekenin bile alamyz. Sebebi sortańdaný, batpaqtaný sııaqty máseler bar. Tıisinshe, men búgin atalǵan bastamany kóterdim, - dedi QR Aeroǵarysh komıteti tóraǵasynyń orynbasary Qýandyq Shúlenbaev Kazinform tilshisiniń saýalyna jaýap bere otyryp.
Spıker bul joba áli talqylaý kezeńinde ekenin atap ótti. Eger oǵan ózbek tarapy qyzyǵýshylyq bildirse, onda Qazaqstan ony iske asyrý úshin barlyq kúsh-jigerdi biriktirýge nıetti.
- Bul usynysty ázirge talqylap jatyrmyz. Bastapqyda ol ǵylymı joba retinde júrýi múmkin. Keıin ony tolyq platforma retinde qalyptastyrý múmindigin qarastyramyz, - dep pikir bildirdi Qýandyq Shúlenbaev.
Al Kazinform tilshisine suhbat bergen «Ózbekkosmos» agenttigi halyqaralyq qatynastar bóliminiń bas mamany Behrýz Mırzaev vedomstvo qurylǵan ýaqyttan beri qazaqstandyq mamandarmen tyǵyz jumys istep kele jatqanyna toqtaldy.
- «Ózbekkosmos» agenttigi qurylǵan sátten bastap Qazaqstanmen óte tyǵyz jumys isteımiz. Bul - bizdiń eń jaqyn kórshimiz ári baýyrymyz. Biz olardan kóp nárseni úırendik. Ǵaryshtyq monıtorıng boıynsha biz qazaq tarapynyń tájirıbesin zerdeledik jáne keıbir mańyzdy baǵdarlamalardy ózimizde engizdik. Sondaı-aq, biz qazir Túrki memleketteri uıymy aıasynda Qazaqstan ázirlep jatqan spýtnıkti qurastyrý jáne ony ǵarysh keńistigine shyǵarý boıynsha jumys istep jatyrmyz. Óz kezeginde biz osy jerserik úshin qozǵaltqysh júıesin daıyndaýǵa járdemdesemiz, - dep túıindedi Behrýz Mırzaev.
Eske salaıyq, atalǵan konferentsııa barysynda 2027 jyly ǵaryshqa shyǵarylatyn túrki elderiniń birlesken spýtnıgi tanystyryldy.
Munymen birge jaqynda kosmosqa attanatyn tuńǵysh ózbek ǵaryshkerine qoıylatyn talaptar jarııalandy.
Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.
Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.
