Qazaqstan men Ózbekstan sý bólý kelisiminiń jańa jobasyn ázirleý boıynsha kelissóz júrgizip jatyr

TAShKENT. KAZINFORM – Sý bólý kelisiminiń jańa jobasyn ázirleý boıynsha Qazaqstan men Ózbekstan arasyndaǵy kelissóz áli de jalǵasyp jatyr, dep habarlaıdy Kazinform agenttiginiń menshikti tilshisi.

Ózbekstannyń Irrıgatsııa jáne sý máseleleri jónindegi ǵylymı-zertteý ınstıtýtynyń 100 jyldyǵyna oraı ótken konferentsııaǵa qatysqan QR Sý resýrstary jáne ırrıgatsııa mınıstri Nurjan Nurjigitov jańa kelisim boıynsha júrgizilip jatqan kelissóz jaıly aıtty.

- Bul jumys búgingi kúnge deıin jalǵasyp jatyr. Atap aıtqanda, Qazaqstan jáne Ózbekstannyń memlekettik organdarymen kelisý protsesi júrgizilýde. Bir-eki pozıtsııa qalyp otyr, ázirge solar boıynsha naqty sheshimge kelgen joqpyz. Tıisinshe, kelissóz jalǵasady, - dedi Nurjan Nurjigitov Kazinform tilshisiniń saýalyna jaýap bere otyryp.

Toqtala ketsek, bıyl qańtarda Qazaqstan tarapy sý bólý kelisiminiń jańa jobasyn ázirlep, ony Ózbekstanǵa joldaǵan edi.

- Biz elimizdiń memlekettik organdarymen kelisilgen jobany ózbek tarapyna berdik. 15 kún ishinde olar bizge jaýap joldaıdy, - degen edi Nurjan Nurjigitov jyl basynda Kazinform tilshisine bergen suhbatynda.

Eske salaıyq, bıyl 29 qantarda Dýshanbe qalasynda Ortalyq Azııanyń Memleketaralyq sý sharýashylyǵyn úılestirý komıssııasynyń 88-shi otyrysy ótti. Onyń barysynda jasalǵan kelisim nátıjesinde Qazaqstan kórshiles elderden kóktemde 11 mlrd tekshe metr sý alatyn boldy.