Qazaqstan men Ózbekstan sport salasyndaǵy yntymaqtastyqty nyǵaıtady
ALMATY. KAZINFORM – Almatyda Qazaqstan Respýblıkasynyń Týrızm jáne sport mınıstri Erbol Myrzabosynov Ózbekstan Respýblıkasynyń Sport mınıstri Adham Ikramovpen ekijaqty kezdesý ótkizdi.
Kezdesýge Qazaqstan Ulttyq olımpıada komıtetiniń prezıdenti Gennadıı Golovkın, Ózbekstan UOK tóraǵasynyń birinshi orynbasary Otabek Ýmarov, Paralımpıada komıtetteriniń jáne sport salasyndaǵy birqatar uıym basshysy qatysty.
Kelissózder barysynda taraptar birlesken is-qımyldyń ózekti baǵyttaryn talqylady. Atap aıtqanda, sport kadrlaryn daıarlaý, paralımpıadalyq sportty damytý jáne ulttyq sport túrlerin birlese nasıhattaý jáne damytý máseleleri qaraldy. Sondaı-aq bıyl qarasha aıynda Túrkistanda fýtboldan eki eldiń ulttyq quramalary arasynda joldastyq match ótkizý jáne 2026 jyly Astanada uıymdastyrylatyn halyqaralyq «Bolashaq oıyndary» týrnırine Ózbekstan delegatsııasynyń qatysýy sóz boldy.
– Qazaqstan men Ózbekstan – sport salasyndaǵy strategııalyq seriktester. Bizdi ortaq maqsattar, sondaı-aq tarıhı jáne mádenı baılanystar biriktiredi. Eki el arasyndaǵy praktıkalyq yntymaqtastyqty keńeıtý sport salasynyń damýyna tyń serpin beretinine senimdimin, - dedi Erbol Myrzabosynov.
Budan bólek mınıstr Astanadaǵy Ulttyq sport ýnıversıtetiniń qurylysy aıaqtalǵanyn atap ótip, Ózbekstan tarapyn sporttyq bilim berý salasynda tyǵyz yntymaqtastyq ornatýǵa shaqyrdy.
– Qazaqstan Ulttyq Olımpıada komıteti árqashan yntymaqtastyqqa ashyq ári áriptesterimizdiń bastamalaryn joǵary baǵalaıdy. Ásirese, Olımpıadalyq qozǵalys aıasyndaǵy birlesken jumystyń mańyzy zor. Mundaı kezdesýler ózara áriptestikti nyǵaıtyp, elderimizde sportty damytýǵa jańa múmkindikter ashady, - dedi Gennadıı Golovkın.
Kezdesý sońynda taraptar Qazaqstan men Ózbekstan arasyndaǵy seriktestikti nyǵaıtýǵa, turaqty sporttyq dıalogty damytýǵa nıetti ekendikterin jetkizdi.