Qazaqstan men Ózbekstan Syrtqy ister mınıstrlikteriniń ózara yntymaqtastyq baǵdarlamasy qabyldandy
TAShKENT. KAZINFORM – Tashkentke resmı saparmen kelgen Syrtqy ister mınıstri Ermek Kósherbaev ózbekstandyq áriptesi Bahtıer Saıdovpen kezdesti, dep habarlaıdy Kazinform agenttiginiń Tashkenttegi menshikti tilshisi.
Vedomstvo basshylary áýeli shaǵyn quramda kelissóz júrgizip, qazaq-ózbek baılanystaryn tereńdetý múmkindikterin talqylady. Keıin keńeıtilgen otyrysta mınıstrler strategııalyq jáne odaqtastyq qatynastardy odan ári nyǵaıtýǵa beıil ekenin atap ótti.
Sonymen qatar seriktestiktiń keleshek jospary qaraldy. Atap aıtqanda, taraptar ekonomıka, ónerkásiptik kooperatsııa jáne mádenı-gýmanıtarlyq sektordaǵy jobalardy birlese ilgeriletýge ýaǵdalasty.
Kezdesý qorytyndysy boıynsha Qazaqstan men Ózbekstan Syrtqy ister mınıstrlikteri arasyndaǵy 2026-2027 jyldarǵa arnalǵan yntymaqtastyq baǵdarlamasyna qol qoıyldy. Qujatta yqpaldastyqtyń basym baǵyttary qamtylǵan.
Eske salaıyq, qańtar aıynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Bir aıda resmı Astana men Tashkent arasyndaǵy taýar aınalymy 400 mln dollardan asty
Qosa ketsek, bıyl alǵashqy eki aıda 380 myńnan astam qazaqstandyq Ózbekstanǵa saıahattap barǵan.
