Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatyr
TAShKENT. KAZINFORM — Qazaqstan men Ózbekstan birlesip, Syrdarııa ózeniniń sýyn esepke alý júıesin avtomattandyrý jumysyn júrgizip jatyr. Bul týraly Tashkentte ótip jatqan «Water week» forýmynda sóz sóılegen Sý resýrstary jáne ırrıgatsııa mınıstri Nurjan Nurjigitov málimdedi, dep habarlaıdy Kazinform agenttiginiń Tashkenttegi menshikti tilshisi.
— Qazirgi ýaqytta biz ózbekstandyq áriptesterimizben birge Syrdarııa ózeniniń sýyn esepke alý júıesin avtomattandyrý boıynsha birlesken jumys júrgizip jatyrmyz. Bul rette 10 negizgi ýchaske iriktelip alyndy. Onyń beseýi Qazaqstan aýmaǵynda bolsa, qalǵany Ózbekstanda ornalasqan. Belgilengen aımaqtarǵa zamanaýı avtomattandyrylǵan esepke alý jáne monıtorıng júıelerin engizý josparlanǵan, — dedi mınıstr.
Atalǵan jumystar ınstıtýtsıonaldyq deńgeıde bekitilgen. ıAǵnı, byltyr Qazaqstan men Ózbekstan úkimetteri arasynda tıisti kelisimge qol qoıyldy.
— Qujat onlaın rejımde derektermen almasý júıesin qurýdy, sondaı-aq memleketaralyq mańyzy bar sý sharýashylyǵy nysandaryn jańǵyrtýdy, transshekaralyq sý obektilerin birlesip basqarýdy kózdeıdi. Bul sharalardy iske asyrý sý resýrstaryn basqarýdyń ashyqtyǵyn qamtamasyz etedi. Birinshi kezeńdegi jobalardy júzege asyra otyryp, aldaǵy ýaqytta Syrdarııa ózeniniń ózge de ýchaskelerin avtomattandyrýǵa kirisemiz. Sondaı-aq, ortaq basseınderdi eskere otyryp, Ortalyq Azııanyń basqa memleketterin osy jumysqa kezeń-kezeńimen tartý josparlanǵan, — deıdi Nurjan Nurjigitov.
Eske salaıyq, buǵan deıin Sý resýrstary jáne ırrıgatsııa mınıstri Qazaqstan sý sharýashylyǵy salasyndaǵy ulttyq saıasatty únemi jetildirip jatqanyn aıtyp edi.
Qosa ketsek, taıaýda Kazinform agenttigine suhbat bergen ózbekstandyq sarapshy Vadım Sokolov aımaqtaǵy sý tapshylyǵy bıyl da kúrdeli ekenin aıtqan edi.
