Qazaqstan men Ózbekstan Syrdarııa ózeninde avtomattandyrylǵan gıdrobeket ornatý jobasyn bastamaq
ASTANA. KAZINFORM – QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, joba aıasynda Qazaqstan men Ózbekstan aýmaǵynda bes-besten nysan salynady.
Germanııanyń Halyqaralyq yntymaqtastyq qoǵamynyń (GIZ) qoldaýymen ázirlengen bul joba transshekaralyq sýdy bólýdiń ashyqtyǵy men dáldigin qamtamasyz etýge baǵyttalǵan. Qazirgi ýaqytta GIZ osy joba boıynsha tehnıkalyq tapsyrmany ázirleýdi aıaqtady.
-Byltyr eki memlekettiń basshylarynyń qatysýymen biz transshekaralyq sý nysandaryn birlesip basqarý jáne utymdy paıdalaný týraly úkimetaralyq kelisimge qol qoıdyq. Bul qujat kópjyldyq jumystyń nátıjesi boldy, sonyń arqasynda transshekaralyq sýdy basqarýdyń kelisilgen tásilderin ázirleý múmkin boldy. Sondyqtan bul kelisimniń qabyldanýy tarıhı mańyzǵa ıe oqıǵa. Kelisim Ortalyq Azııadaǵy sý dıplomatııasyn damytýǵa eleýli úles qosady jáne bolashaqtaǵy ózara tıimdi yntymaqtastyqtyń negizgi baǵyttaryn naqty aıqyndaıdy. Biz ekijaqty áriptestikti tatý kórshilik, ózara qurmet jáne syndarly dıalog rýhynda odan ári damytýǵa nıettimiz, – dedi Sý resýrstary jáne ırrıgatsııa mınıstri Nurjan Nurjigitov.
Mınıstr sondaı-aq Memleket basshysy Qasym-Jomart Toqaevtyń BUU aıasynda Halyqaralyq sý uıymyn qurý jáne Ortalyq Azııa elderiniń sý paıdalaný jónindegi Negizdemelik konventsııasyn ázirleý týraly bastamalaryn atap ótip, olardyń óńirlik sý yntymaqtastyǵyn uzaq merzimdi turǵyda damytý úshin erekshe mańyzdy ekenin jetkizdi.
Aıta keteıik, atalǵan másele Túrkistan qalasynda ótken Qazaqstan Respýblıkasy men Ózbekstan Respýblıkasy arasyndaǵy sý qatynastarynyń barlyq baǵyty boıynsha ekijaqty yntymaqtastyqty tereńdetý boıynsha usynystar ázirleý úshin birlesken jumys tobynyń XIII otyrysy, sondaı-aq Ortalyq Azııada ózara tıimdi ári ornyqty sý-energetıkalyq yntymaqtastyq tetigin ázirleý jónindegi kúsh-jigerdi úılestirýge baǵyttalǵan qazaq-ózbek birlesken jumys tobynyń II otyrysy aıasynda talqylandy.
Otyrystarǵa QR Sý resýrstary jáne ırrıgatsııa mınıstri Nurjan Nurjigitov, Ózbekstan Respýblıkasynyń Sý sharýashylyǵy mınıstri Shavkat Hamraev jáne Túrkistan oblysynyń ákimi Nuralhan Kósherov qatysty.
Taraptar ekijaqty sý jáne sý-energetıkalyq yntymaqtastyq salalaryndaǵy negizgi máselelerdi talqylady. Atap aıtqanda, «Dostyq» memleketaralyq kanalyn tazalaý jáne jóndeý jumystary qaraldy. Byltyr Qazaqstan tarapy kanaldyń ýchaskelerinde, eńisterinde, kollektorlarynda jáne bas qurylysjaılarynda mehanıkalyq tazalaý jumystaryn júrgizdi. Sonymen qatar nysannyń bas jáne bógeıtin qurylysjaılaryndaǵy qaqpalarǵa jóndeý jumystary jasaldy. Bıyl «Dostyq» kanalyn mehanıkalyq tazalaý jáne bas qurylysjaılaryn jóndeý jumystary jalǵasyn tabady. Taraptar sondaı-aq sý únemdeý tehnologııalaryn engizý jáne paıdalaný salasynda tájirıbe almasýǵa kelisti.