Qazaqstan men Ózbekstan Syrdarııa boıyna sý esepteıtin qurylǵylar ornatýdy bıyl aıaqtaıdy

TAShKENT. KAZINFORM – Syrdarııa boıyna sý esepteıtin qurylǵylardy ornatýmen aınalysatyn sheteldik kompanııa búginde tender ótkizip jatyr, dep habarlaıdy Kazinform agenttiginiń menshikti tilshisi.

Ózbekstan astanasynda ótken ekijaqty kezdesýden soń Kazinform tilshisiniń saýalyna jaýap bergen Sý resýrstary jáne ırrıgatsııa mınıstri Nurjan Nurjigitov qurylǵylardy ornatý jumysy qalaı júrip jatqanyn aıtty.

- Biz byltyr Syrdarııa boıyna sýdyń kólemin anyqtaıtyn arnaıy 10 qurylǵyny ornatýǵa ýaǵdalasqan edik. Jabdyqtardy usynyp, ony ornatýmen nemistiń GIZ kompanııasy aınalysady. Bul kásiporyn ázirge tender jumystaryn júrgizip jatyr. 15 aqpanda onyń qorytyndysy shyǵýy tıis. Sý esepteıtin qurylǵylardy ornatýdy bıyl aıaqtaýdy josparlap otyrmyz, - dedi mınıstr.

Spıkerdiń sózinshe, Qazaqstanda – 5, Ózbekstan aýmaǵynda taǵy 5 sý esepteıtin qurylǵy ornatylady.

- Osynyń nátıjesinde Syrdarııa ózenindegi sýdyń kólemi týraly málimetterdi avtomatty túrde alyp otyramyz. Qazirgi tańda Ózbekstan esepteý qurylǵylaryn tájik tarapymen de birlesip ornatýǵa kiristi. Osy oraıda, olardan alynatyn aqparattardy da bizdiń júıemen ıntegratsııalaýǵa kelistik, - dep túsindirdi N.Nurjigitov.

Naqtylaı keteıik, atalǵan qurylǵylardy ornatýǵa Qazaqstan men Ózbekstan qarajat bólmeıdi. Bul qyzmetti GIZ kompanııasy ózara áriptestik negizde tegin kórsetpek.

Mınıstrdiń aıtýynsha, Qazaqstan men Ózbekstan sý bólý kelisiminiń jobasyn ázirlep jatyr.

Sonymen qosa, qazirgi ýaqytqa deıin Shardara qoımasyna 4,5 mlrd tekshe metr sý jınaldy. Ótken jyldyń sáıkes kezeńimen salystyrǵanda bul 1,87 mlrd tekshe metrge artyq. Nurjan Nurjigitov sý máselesine qatysty pikir bildire otyryp, «Jaǵdaı byltyrǵydan jaman bolmaıdy», dep sendirdi.