Qazaqstan men Ózbekstan shekarasynan 2 keli geroın alyp ótpek bolǵan kúdikti ustaldy
NUR-SULTAN. QazAqparat - Qazaqstan men Ózbekstan shekarasyndaǵy keden beketinde 2 keli geroın alyp ótpek bolǵan kúdikti ustaldy. Asa iri kólemde esirtkini kólikten "Lamar" esimdi ıisshil ıt tapqan, dep habarlaıdy QazAqparat tilshisi.
Túrkistan oblystyq PD baspasóz qyzmetiniń málimetinshe, Maqtaaral APB-niń polıtseıleri Ózbekstan Respýblıkasynan Qazaqstan terrıtorııasyna ótetin shekara aýmaǵynda «Paýtına» jedel aldyn alý is-sharasyn júrgizgen. «Paýtına» is-sharasyn atqarýǵa Túrkistan oblysy Polıtsııa departamenti Esirtki qylmysyna qarsy is-qımyl basqarmasynyń polıtseıleri, Krımınaldyq polıtsııa qyzmetkerleri jáne Ulttyq qaýipsizdik komıtetiniń arnaıy ókilderi jumyldyrylǵan.
Ózbekstannan esirtki tasymaldaýshy osy shara aıasynda ustalǵan. Túngi saǵat 1:00-der shamasynda «Atameken» kedendik baqylaý beketinen polıtseıler «Neksııa» kóligin toqtatady.
Kólik júrgizýshisiniń qujattaryn tekserý barysynda odan kúdik týǵyzǵan áreketter baıqalǵan. Osy kezde keden beketindegi Lamar atty ıt tynymsyzdanyp, kólikke umtylǵan. Iesine belgi bergennen keıin saqshylar kólikte bir kinárattyń baryn sezedi. Osylaısha qujattarynda esh kemshilik bolmaǵan júrgizýshi kólikke minip ketpek bolǵan sátte, kólikke qaraı Lamardy bosatady.
Tájirıbeli ıt kóliktiń astyńǵy jaǵynan «bagke» japsyrylyp jasalǵan qupııa temir qaltany tabady. Tekserý kezinde júrgizýshi avtokóliginiń janarmaı quıatyn «bagynyń» janynan qupııa qalta jasatyp, sonyń ishine álgi esirtki tektes zatty jasyryp qoıǵany anyqtalǵan. Baktan esirtki tektes zat salynǵan 2 orama alynyp, sarapta qorytyndysy bul zattyń 2 kg «geroın» ekendigin dáleldedi.
" Maqtaaral APB-ne QR Qylmystyq kodeksiniń 286-babymen «Aınalystan alyp qoıylǵan zattardyń nemese aınalysy shektelgen zattardyń kontrabandasy» boıynsha sotqa deıingi tergep tekserýdiń biryńǵaı tizilimine tirkeýge alyndy. Tergeý barysynda belgili bolǵandaı ustalǵan azamat kórshiles eldiń jergilikti turǵyny bolyp shyqty. Ol buryn sońdy sotty bolmaǵan, otbasyly azamat ekeni anyqtaldy. Jaýap alý barysynda kúdikti óziniń tanysynyń tapsyrysy boıynsha esirtkini shekaradan alyp ótpekshi bolǵanyn aıtqan. Eńbekaqysy retinde tanysynan qomaqty qarjy alatyn bolyp keliskenin jetkizgen.
Qazirgi tańda kúdikti azamat ýaqytsha qamaýda. Oǵan qatysty tergeý amaldary jalǵasýda" delingen habarlamada.
