Qazaqstan men Ózbekstan shekarasyndaǵy jańa termınaldar táýligine 100 myń adamǵa qyzmet kórsete alady
ASTANA. KAZINFORM — Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti elshisi Eraly Toǵjanov aldaǵy ashylýǵa daıyndyq deńgeıimen tanysý maqsatynda «Jibek joly» (Qazaqstan Respýblıkasy) jáne «Ǵısht-Kópir» (Ózbekstan Respýblıkasy) avtomobıl ótkizý pýnktterine bardy.
Іs-sharaǵa eki eldiń keden jáne shekara qyzmetteriniń, jergilikti atqarýshy organdarynyń, sondaı-aq ótkizý pýnktterin qaıta jańǵyrtý jumystaryn júzege asyratyn merdiger uıymdardyń ókilderi qatysty.
Sapar barysynda elshi nysandardy qaıta jańǵyrtý jumystarynyń nátıjelerimen, ınjenerlik-tehnıkalyq jáne kólik ınfraqurylymynyń jaı-kúıimen, shekaralyq jáne kedendik baqylaýdyń uıymdastyrylýymen, sondaı-aq eki el azamattarynyń memlekettik shekaradan jaıly ári qaýipsiz ótýi úshin jasalǵan jaǵdaılarmen tanysty.
Aýmaǵy 2,7 gektar bolatyn «Jibek joly» ótkizý pýnktin qaıta jańǵyrtý aıasynda qazaqstandyq tarapta árqaısysynyń aýdany 10 myń sharshy metr bolatyn eki zamanaýı jolaýshylar termınaly salyndy. Ózbekstan jaǵyndaǵy irgeles «Ǵısht-Kópir» ótkizý pýnktiniń aýmaǵy 9 gektar.
Jańǵyrtylǵan ótkizý pýnktteri táýligine 70 myń adamǵa deıin, al júkteme eń joǵary kezeńderde 100 myń adamǵa deıin qyzmet kórsetýge eseptelgen. Bul Qazaqstan men Ózbekstan arasyndaǵy eń kóp paıdalanylatyn shekaralyq ótkelderdiń biriniń ótkizý qabiletin edáýir arttyrýǵa múmkindik beredi.
Nysandardy aralaý qorytyndysy boıynsha eki ótkizý pýnktiniń de paıdalanýǵa tehnıkalyq turǵydan daıyn ekeni atap ótildi. Sonymen qatar olardyń tolyqqandy jumys isteýin qamtamasyz etý úshin syrtqy ınfraqurylymdy jabdyqtaý, onyń ishinde irgeles aýmaqtardy abattandyrý jáne kólik pen jaıaý júrginshiler qozǵalysyn uıymdastyrý jumystaryn aıaqtaý qajet. Atalǵan jumystardy oryndaý jergilikti atqarýshy organdarǵa júktelgen.
Infraqurylymdyq jumystardy aıaqtaý jáne ótkizý pýnktterin bir mezgilde ashýdy qamtamasyz etý máseleleri boıynsha Qazaqstan men Ózbekstannyń quzyretti memlekettik organdarynyń kelisilgen is-qımyldaryna erekshe nazar aýdaryldy.
Jańǵyrtylǵan «Jibek joly» jáne «Ǵısht-Kópir» ótkizý pýnktteriniń ashylýy memlekettik shekaradan ótý úshin qolaıly jaǵdaı jasaýǵa, shekaralyq rásimderden ótý ýaqytyn qysqartýǵa, sondaı-aq Qazaqstan men Ózbekstan arasyndaǵy saýda-ekonomıkalyq jáne gýmanıtarlyq baılanystardy odan ári damytýǵa jańa serpin berýge múmkindik beredi.
Aıta ketelik Qazaqstan men Ózbekstan kóliktik baqylaýdy tsıfrlandyrý máselesin qaraǵan edi.
