Qazaqstan men Ózbekstan shekarasyndaǵy «Qaplanbek» avtobeketi ashyldy
ASTANA. KAZINFORM - EAEO-nyń Qytaı, Ózbekstan jáne Túrikmenstan elderimen syrtqy shekarasynda ornalasqan 9 avtomobıl ótkizý pýnktterin tolyqqandy jańǵyrtý jalǵasýda, dep habarlaıdy QR Qarjy mınıstrliginiń baspasóz qyzmeti.
Baspasóz qyzmetiniń málimetterine qaraǵanda, Ózbek tarapynyń jańǵyrtý jónindegi qurylys jumystaryn aıaqtaý úshin «Gısht-Kýprık» (QR irgeles «Jibek joly» keden beketi) ótkizý pýnktiniń ýaqytsha jabylýyna baılanysty «Qaplanbek» (QR) jáne «Navoı» (ÓR) ótkizý pýnktteri eki taraptyń kelisimi boıynsha jeke tulǵalardyń jaıaý júrýi, jeńil avtokólikter men avtobýstardyń ótýi úshin ashylady.
Qazaqstan jáne Ózbekstan tarapymen «Qaplanbek» jáne «Navoı» ótkizý pýnktterinde bir ýaqytta jańǵyrtý men tehnıkalyq jabdyqtaý jumystary júrgizilip, búgin osy ótkizý pýnktteriniń tehnıkalyq ashylýy júrgizildi.
Іske qosý jumystaryna baılanysty 27 qańtar men 5 aqpan aralyǵynda jeke tulǵalardyń, jolaýshylar kólikteri men avtobýstardyń ótýi shekteýli mólsherde júzege asyrylady. 5 aqpannan bastap ótkizý pýnkti tolyǵymen jumys isteıtin bolady.
Odan ári, ekinshi kezeńde, taraptar keliskennen keıin osy ótkizý pýnktterinde júk avtokólik quraldaryn ótkizý júzege asyrylatyn bolady.
«Qaplanbek» ótkizý pýnkti aldyńǵy qatarly halyqaralyq standarttar boıynsha salynǵan, shekaradan ótý kezinde memlekettik baqylaý túrlerin júzege asyrý kezinde qoldanylatyn eń ozyq tehnologııalyq jabdyqtarmen jabdyqtalǵan. Jeke tulǵalardyń shekaradan yńǵaıly ótýi úshin barlyq jaǵdaılar jasalǵan.
Kólik aǵyny qozǵalysynyń barlyq tsıkli avtomattandyrylǵan. Ótkizý qabileti táýligine 20 myń jeke tulǵaǵa jáne 800 avtokólik quralyna deıin ulǵaıtylýy kútilýde.
«Jibek joly» keden beketiniń ýaqytsha jabylý kúni qosymsha habarlanatyn bolady.
Osyǵan deıin keden beketinde elge zańsyz kirgen Qytaı kıimderiniń úlken partııasy anyqtalǵany týraly jazdyq.