Qazaqstan men Ózbekstan shekarasynda keptelis joq — Kedendik baqylaý

ASTANA. KAZINFORM – Ótken jyly Qazaqstan-Ózbekstan shekarasynda júk mashınalarynyń kılometrge jetetin keptelisteri bolǵan edi. QR Qarjy mınıstrligi Memlekettik kirister komıteti Kedendik baqylaý departamentiniń dırektory Eldos Saýdabaev bıyl bul jaǵdaı qaıtalanbaýy úshin qandaı sharalar qabyldanǵanyn aıtyp berdi.

Spıkerdiń aıtýynsha, búginde Qazaqstan-Ózbekstan shekarasynda 3 temirjol, 8 avtomobıl ótkizý pýnkti jumys isteıdi. Olardyń barlyǵy negizinen Túrkistan oblysynda ornalasqan.

«Birinshiden, kólik quraldarynyń keptelisine qandaı da bir qubylys sebep bolǵanyn atap ótkim keledi. ıAǵnı, qar jaýady, júrgizýshiler qardyń toqtaǵanyn kútedi de, bári bir ýaqytta ótkizý pýnktine barady. Mundaı kúnderi keptelis týyndaıdy. Qazir tájirıbe jınadyq, eger aýa raıy nasharlasa, aldyn-ala qashan jylynatynyn qaraımyz jáne sol kúni kedendik beketke qyzmetkerlerdi kóbirek shyǵaramyz. Oǵan qosa, elektrondy kezek engizildi. Ol da jaqsy kórsetkishter beredi», - dep jaýap berdi Eldos Saýdabaev.

Ol Qazaqstannan Ózbekstanǵa táýligine barlyq ótkizý pýnktteri boıynsha 250-ge jýyq kólik ótetinin atap ótti.

«B. Qonysbaev keden beketi qaıta jańartylǵannan keıin táýligine 1000-1100 kólik quralyn ótkizedi. Dál qazirgi ýaqytta keptelister joq, - dep tolyqtyrdy Kedendik baqylaý departamentiniń dırektory.