Qazaqstan men Ózbekstan shekarasynda 400-den asa júk kóligi kepteliste tur

AQTAÝ. KAZINFORM — Kólikter memlekettik shekaranyń Qazaqstan aýmaǵynda «Tájen» ótkizý pýnktinde jınalyp qalǵan.

Mańǵystaý oblysy boıynsha memlekettik kirister departamentiniń málimetinshe, 25 qarashada Ózbekstan Respýblıkasynda «Dáýit-Ata — Qońyrat» (400 shaqyrym) avtomobıl joly ashylyp, bul ótkizý pýnktinde kólik keptelisiniń bolýyna áser etken. Osyǵan baılanysty júk kólikteriniń aǵyny kóp.

— Budan basqa, qazirgi ýaqytta «Tájen» ótkizý pýnktinde ótkizý pýnktin jańǵyrtý jáne tehnıkalyq jete jaraqtandyrý sheńberinde qurylys-montajdaý jumystary júrgizilip jatyr, — dep tolyqtyrdy quzyrly organ. 

Táýligine bir baǵytta 150 júk avtokólik ótkizý qabiletine qaramastan «Tájen» keden beketi ótkizý pýnktin qaıta jańartý jaǵdaıynda Qazaqstannan tys jerlerge shyǵýǵa 200-250 júk kóligin ótkizýdi qamtamasyz etedi.

Joǵaryda aıtylǵandardy eskere otyryp, Qazaqstan memlekettik shekarasy arqyly ótkizýdi uzaq kútpes úshin Mańǵystaý oblysy boıynsha MKD taýarlardy tasymaldaýdyń balamaly baǵyttaryn tańdaýdy ne qalyptasqan jaǵdaıdy eskere otyryp, taýarlardy tasymaldaýǵa kóbirek ýaqyt bólýdi usynady.

Sondaı-aq, departament tarapynan kedendik operatsııalardy jedeldetýge baǵyttalǵan qosymsha sharalar qabyldanǵan.

Buǵan deıin habarlaǵanymyzdaı, Qazaqstan men Ózbekstan shekarasynan jeke kýálikpen ótý tártibi engiziledi.