Qazaqstan men Ózbekstan saýda-ekonomıkalyq baılanystardy keńeıtýdi maquldady
BUHARA. KAZINFORM – Ózbekstan prezıdenti Buharadaǵy búgingi júzdesýdiń eki el arasyndaǵy san qyrly baılanystardy keńeıtýde mańyzy zor dep paıymdaıdy. Bul týraly Aqordanyń baspasóz qyzmeti habarlady.
– Sizdiń bul saparyńyz ǵasyrlardan tamyr tartatyn qos halyq arasyndaǵy dostyqty, tyǵyz baýyrlastyqty kórsetedi, sondaı-aq strategııalyq seriktestik pen odaqtastyq qarym-qatynastyń udaıy nyǵaıyp kele jatqanyna dálel. Ashyq ári rııasyz kelissózder yntymaqtastyǵymyzdyń mazmunyn baıyta túsip, naqty nátıjelerge qol jetkizýge, óńirdegi ózara yqpaldastyq aıasyn odan ári keńeıtýge negiz bolatynyna senimdimin, - dedi Shavkat Mırzıeev.
Ol ózbek halqynyń eń jaqyn kórshi jáne odaqtas retinde Qasym-Jomart Toqaevtyń Ádiletti Qazaqstan qurý jolyndaǵy tıimdi reformalaryna shynaıy qoldaý bildiretinin jetkizdi.
– Álemdegi kúrdeli ahýalǵa qaramastan, elińizdiń ekonomıka kólemi 300 mıllıard dollardan asty. Shıkizattyq emes sektor jandanyp, ishki jalpy ónimde shaǵyn jáne orta kásipkerliktiń úles salmaǵy 40 paıyzǵa jýyqtady. Siz memleketti tsıfrlandyrý isine erekshe mán beresiz. Bıyl Qazaqstanda Tsıfrlandyrý jáne jasandy ıntellekt jyly dep jarııaladyńyz. Elińizdiń jahandyq keńistiktegi abyroıy artyp keledi. Sizdiń basshylyǵyńyzben Qazaqstan halqynyń múddesine negizdelgen kópvektorly syrtqy saıasat tabysty júzege asyrylyp jatyr. Siz kótergen halyqaralyq bastamalar keńinen qoldaý taýyp otyr. Bul Sizdiń aımaqtyq jáne álemdik problemalardy sheshý isindegi kórnekti saıası qaıratker ekenińizdi kórsetedi. National Interest basylymyna jarııalanǵan maqalańyzdy erekshe yqylaspen oqydym. Qazirgi halyqaralyq ahýalda pragmatızmniń, ashyqtyqtyń jáne shynaıylyqtyń róli artty degen oıyńyzben tolyq kelisemin. Ekonomıkalyq jańǵyrý máselesine tereń úńiletinińizdi atap ótkim keledi. Investıtsııa men ornyqty damý reformalaryn ushtastyrýdy jekelegen bastama retinde qarastyrmaı, tutas strategııaǵa aınaldyrdyńyz. Muny erekshe baǵalaımyn. Biz Sizdiń baýyrlas halyqtar arasyndaǵy tatý kórshilik qarym-qatynasty, strategııalyq seriktestik pen odaqtastyqty nyǵaıtýǵa qosqan úlesińizdi aıryqsha qadirleımiz, - dedi Ózbekstan prezıdenti.
Kezdesýde taraptar ekonomıkalyq seriktestikti keńeıtý jónindegi strategııalyq baǵytty ustanatynyn rastady.
Saýda men óndiris salalarynda naqty kórsetkishterge qol jetkizý úshin eki el úkimetteriniń yqpaldastyǵyn arttyrý týraly kelisim jasaldy. Іsker ortany júıeli túrde qoldaý men yntalandyrýdyń mańyzy atap ótildi.
Memleketter basshylary sırek kezdesetin metaldardy óndirý men óńdeý, kólik-tranzıt, sý-energetıka salalary jáne ІT sektoryndaǵy yqpaldastyq máselelerin egjeı-tegjeıli talqylady.
Sondaı-aq mádenı-gýmanıtarlyq baılanystardy nyǵaıtý men týrızmdi damytý isine aıryqsha mán berildi.
Kelissóz qorytyndysy boıynsha prezıdentter eki el úkimetteri arasyndaǵy Saýda-ekonomıkalyq yntymaqtastyqty odan ári damytý jónindegi jol kartasyn qabyldaýǵa ýaǵdalasty.
Eske sala keteıik, buǵan deıin Qasym-Jomart Toqaev Ózbekstan prezıdentimen beıresmı kezdesý ótkizgenin jazǵan edik.
