Qazaqstan men Ózbekstan prokýratýralary zańsyz tasymalǵa qarsy kúresti kúsheıtýge kelisti
ASTANA. KAZINFORM – Búgin Tashkent qalasynda Qazaqstan Respýblıkasynyń Bas kólik prokýrory men Ózbekstan Respýblıkasynyń Kólik prokýrorynyń ekijaqty kezdesýi ótti.
Kelissózder barysynda kólik jáne kedendik ákimshilendirý salasyndaǵy zańdylyqty qamtamasyz etý máseleleri talqylandy. Ózara taýar aınalymynyń ósýi men tranzıttik tasymal kóleminiń artýy jaǵdaıynda kólik salasyndaǵy quqyqtyq tártipti saqtaý erekshe ózektilikke ıe ekeni atap ótildi.
Ótkizý pýnktteri arqyly taýarlardy zańsyz ótkizýge qarsy is-qımyl jasaýǵa jáne onyń aldyn alýdyń tıimdi sharalaryn ázirleýge erekshe kóńil bólindi. Taraptar halyqaralyq is-qımyldy nyǵaıtý men jedel aqparat almasýdy jetildirýdiń mańyzdylyǵyn atap ótti.
Kezdesý qorytyndysy boıynsha Qazaqstan men Ózbekstannyń kólik prokýratýralary arasyndaǵy zańdylyq pen quqyqtyq tártipti qamtamasyz etýge baǵyttalǵan yntymaqtastyqty odan ári tereńdetýge daıyndyq rastaldy.
Aıta ketelik Qazaqstan men Ózbekstan Syrtqy ister mınıstrlikteriniń ózara yntymaqtastyq baǵdarlamasy qabyldanǵan edi.
