Qazaqstan men Ózbekstan Prezıdentteriniń ýaǵdalastyqtary jónindegi Jol kartasyna qol qoıyldy

ASTANA. QazAqparat – Prezıdenttiń Ózbekstanǵa saparynyń qorytyndysy boıynsha ekijaqty ózara is-qımyldyń barlyq basym salalarynda serpindi ýaǵdalastyqtarǵa qol jetkizildi. Olardy iske asyrý týraly arnaıy ázirlengen Jol kartasynda egjeı-tegjeıli jazylǵan, dep habarlaıdy QazAqparat Úkimettiń telegram kanalyna silteme jasap.

Qazaqstan Premer-Mınıstri Álıhan Smaıylov Astanaǵa jumys saparymen kelgen Ózbekstan Premer-Mınıstriniń orynbasarlary Jamshıd Hodjaevpen jáne Jýrabek Myrzamahmýdovpen kelissóz júrgizdi. Taraptar QR Prezıdenti Qasym-Jomart Toqaevtyń bıyl 21-22 jeltoqsanda Ózbekstanǵa jasaǵan saparynyń qorytyndysy boıynsha eki memleket basshylarynyń bergen tapsyrmalaryn iske asyrý máselelerin talqylady.

Álıhan Smaıylov QR Prezıdentiniń Ózbekstanǵa saparynyń qorytyndysy boıynsha ekijaqty ózara is-qımyldyń barlyq basym salalarynda serpindi ýaǵdalastyqtarǵa qol jetkizilgenin atap ótti. Olardy iske asyrý týraly arnaıy ázirlengen Jol kartasynda egjeı-tegjeıli jazylǵan, bul respýblıkalar arasyndaǵy strategııalyq áriptestikti odan ári nyǵaıtýǵa serpin beredi.

«Memleket basshylary birinshi kezektegi birqatar mindetterdi aıqyndap, olardy iske asyrý merzimderin naqty belgilep berdi. Azamattarymyzdyń ál-aýqatyn arttyrýǵa baǵyttalǵan barlyq sharalardy júzege asyrý úshin úılesimdi jáne tıimdi jumysty qamtamasyz etýimiz kerek», - dedi Premer-Mınıstr.

Qos el arasyndaǵy taýar aınalymy turaqty ósip keledi. Bul rette basty mindetterdiń biri – ónimdi tasymaldaý kezinde «tar dálizderdi» keńeıtip, jalpy ákimshilik kedergilerdi joıý.

«Bizdiń elderimizdiń kásipkerleri ózara belsendi iskerlik qarym-qatynastar ornatqan, sondyqtan bızneske jańa birlesken jobalardy iske qosýǵa jan-jaqty qoldaý qajet. Biz sizdermen birge osy baǵytta jumys isteýge daıynbyz», - dedi Álıhan Smaıylov.

Sonymen qatar, taraptar sý sharýashylyǵy salasyndaǵy yntymaqtastyqtyń ózekti máselelerin talqylady.

Óz kezeginde Jamshıd Hodjaev Ózbekstan Úkimeti barlyq tıimdi baǵyttar boıynsha ortaq maqsattar men mindetterge qol jetkizý úshin Qazaqstan Úkimetimen tyǵyz yntymaqtastyqta nátıjeli jumys isteýge ázir ekenin atap ótti.

Kezdesý sońynda QR Premer-Mınıstri Álıhan Smaıylov 2022 jylǵy 21-22 jeltoqsanda eki el Prezıdentteri arasynda ótken kelissóz qorytyndysy boıynsha qol jetkizilgen ýaǵdalastyqtardy iske asyrý jónindegi Jol kartasyna qol qoıdy. Ózbek tarapynan bul qujatqa ÓR Premer-Mınıstri Abdýlla Arıpov qol qoıady.

Foto: t.me/KZgovernment