Qazaqstan men Ózbekstan prezıdentteri Joǵary memleketaralyq keńestiń ekinshi otyrysyna qatysty

TAShKENT. KAZINFORM — Jıynnyń kún tártibinde eki eldiń saýda-ekonomıka, kólik-tranzıt, sý-energetıka jáne mádenı-gýmanıtarlyq salalardaǵy yntymaqtastyq máseleleri qarastyryldy. Bul týraly Aqordanyń baspasóz qyzmeti habarlady.

Memleket basshysy qonaqjaılyǵy úshin Prezıdent Shavkat Mırzıeevke rızashylyǵyn bildirip, saparynyń basty maqsaty – qos halyqtyń dostyǵyn nyǵaıtyp, tatý kórshilik baılanystaryn kúsheıtý, sondaı-aq túrli saladaǵy ózara tıimdi yqpaldastyqty damytý ekenine nazar aýdardy.

– Qurmetti Shavkat Mıromonovıch, Ózińizdiń qajyrly eńbegińizdiń arqasynda elińizde kóptegen oń ózgeris bolyp jatyr. Halyqtyń ál-aýqatyn jaqsartýdy kózdeıtin mańyzdy bastamalar qolǵa alyndy. Ózbekstan – biz úshin týystas, aǵaıyn el, tatý kórshi ári senimdi seriktes. Qos el arasyndaǵy dostyqtyń tamyry tereń, halyqtarymyzdyń rýhanı qundylyqtary ortaq deýge bolady. Qazaq-ózbek qarym-qatynasy strategııalyq seriktestik jáne odaqtastyq rýhynda qarqyndy damyp kele jatyr, – dedi Memleket basshysy.

Qasym-Jomart Toqaev halyqaralyq ahýal aýmaly-tókpeli kezeńde san qyrly yqpaldastyqtyń damý qarqynyn arttyrý qajet ekenin atap ótti. 

Aıta ketelik Memleket basshysy Ózbekstan Prezıdenti Shavkat Mırzıeevpen kelissóz júrgizgeni týraly jazǵan edik.