Qazaqstan men Ózbekstan prezıdentteri «Taza aýa» jobasyn birlesip júzege asyrýdy usyndy
BUHARA. KAZINFORM – Memleket basshysy Ózbekstan prezıdentiniń «Taza aýa» bastamasyna qoldaý bildirip, bul joba Qazaqstannyń iri qalalary úshin de ózekti ekenine toqtaldy. Bul týraly Aqordanyń baspasóz qyzmeti habarlady.
– Sizdiń taza aýaǵa qatysty bastamańyzdy quptaımyn. Tashkenttegi ekologııalyq jaǵdaıǵa alańdaýshylyq bildirýińizdi túsinemin. Bizdiń Almaty qalasyndaǵy ahýal da tym kúrdeli. Ókinishke qaraı, Almaty álemdegi aýasy lastanǵan iri qalalar qatarynda tur. Sondyqtan shuǵyl sharalar qabyldaý qajet. Eger Siz qarsy bolmasańyz, «Taza aýa» bastamasyn birlesip iske asyrýdy usynamyz. Prezıdentter uıytqy bolǵan bul jobany úkimetterimiz júzege asyrady. Jurtshylyq pen halyqaralyq qoǵamdastyq muny qýattaıdy dep sanaımyn. Shyn máninde, bul bastama aıasynda kóp is atqarýǵa bolady. Osy arqyly jergilikti bılik pen kásipkerler ekologııany qorǵaýda, tabıǵatty aıalaýda jaýapkershilik júgin jete sezinedi, - dedi Qasym-Jomart Toqaev.
Eske sala keteıik, buǵan deıin Qasym-Jomart Toqaev Ózbekstan prezıdentimen beıresmı kezdesý ótkizgenin jazǵan edik.
