Qazaqstan men Ózbekstan prezıdentteri Buharanyń tarıhı oryndaryn aralady
BUHARA. KAZINFORM – Qasym-Jomart Toqaev pen Shavkat Mırzıeev IV-III ǵasyrlarda boı kótergen Ark qamalyn tamashalady. Bul týraly Aqordanyń baspasóz qyzmeti habarlady.
Kóne nysan san ret qıraǵanymen qaıta qalpyna keltirilgen. Qazirgi ýaqytta bekinis aýmaǵynda Buhara memlekettik mýzeı-qoryǵy ornalasqan.
Budan keıin memleketter basshylary Buharadaǵy tanymal oryndardyń biri «Lıabı-haýz» keshenine bardy. Munda XVII ǵasyrda salynǵan Nádir Dıýan-Begi medresesi men hanakasy, XVI ǵasyrda irgetasy qalanǵan Kókiltash medresesi sekildi áıgili sáýlet eskertkishterin kóre alasyz.
Qazaqstan men Ózbekstan kóshbasshylary XII-XVI ǵasyrlarda salynǵan Kalıan munarasy men meshiti, Mırı Arab medresesi sekildi úsh ǵımarattan turatyn «Poı-Kalıan» tarıhı kesheninde boldy.
Buhara ǵasyrlar boıy Ortalyq Azııadaǵy negizgi rýhanı ilim ortalyqtarynyń biri bolǵany belgili.
Jergilikti medreselerde qazaqtyń Máshhúr Júsip Kópeıuly, Nurjan Naýshabaev, Shortanbaı Qanaıuly jáne basqa da kórnekti qaıratkerleri bilim nárimen sýsyndaǵan. Olardyń esimderi eki el tarıhyna ortaq.
Budan bólek, memleketter basshylaryna Máshhúr Júsip Kópeıulynyń mýzeı-qujyrasy tanystyryldy. Prezıdentter Buharada oqyǵan qazaq zııalylary týraly kórmeni aralap kórdi.
Eske sala keteıik, buǵan deıin Toqaev pen Mırzıeev MERGANTEKS maqta-mata klasteriniń jumysymen tanysqanyn jazǵan edik.
