Qazaqstan men Ózbekstan prezıdentteri birlesken jobalardy iske qosý rásimine qatysty
TAShKENT. KAZINFORM — Qasym-Jomart Toqaev pen Shavkat Mırzıeev vıdeo baılanys arqyly Qazaqstan men Ózbekstannyń birlesken jobalaryn iske qosý rásimine qatysty. Bul týraly Aqordanyń baspasóz qyzmeti habarlady.
Taraptar ónerkásip, qurylys, munaı-gaz hımııasy, qarjy, logıstıka jáne týrızm salalarynda jalpy quny 1,2 mıllıard dollar bolatyn 7 joba ázirlegen.
Memleketter basshylary sımvolıkalyq túımeni basyp, birneshe jobany bastap berdi.
Atap aıtqanda, Syrdarııa jáne Túrkistan oblystarynda «Ortalyq Azııa» Halyqaralyq ónerkásip kooperatsııasy ortalyǵy, Tashkentte «Tenge Bank» bas keńsesi qyzmetine kiristi. Sondaı-aq Tashkent oblysynda kópbeıindi logıstıka ortalyǵynyń, Jańa Tashkentte «Astana» turǵyn úı oramynyń, Qashqadarııa oblysynda alkılbenzol óndiretin munaı-gaz hımııasy kesheniniń, Jańa Tashkentte «Astana» qonaq úıiniń, al elordamyzda «Tashkent» qonaq úıiniń qurylysy bastaldy.
Aıta ketelik Qazaqstan men Ózbekstan prezıdentteri Joǵary memleketaralyq keńestiń ekinshi otyrysyna qatysty.