Qazaqstan men Ózbekstan prezıdentteri birqatar birlesken jobany iske qosady

TAShKENT. KAZINFORM – 14-15 qarashada memlekettik saparmen Ózbekstanǵa baratyn Qazaqstan Prezıdenti Qasym-Jomart Toqaev kórshiles eldiń basshysy Shavkat Mırzıeevpen kelissóz júrgizedi, sondaı-aq birqatar jobany iske qosady, dep habarlaıdy Kazinform agenttiginiń menshikti tilshisi.

Sapar baǵdarlamasyna sáıkes, Qazaqstan men Ózbekstan kóshbasshylarynyń tóraǵalyǵymen Tashkentte Joǵary memleketaralyq keńestiń ekinshi otyrysy ótedi. Buǵan qosa, prezıdentter saýda, ónerkásiptik kooperatsııa, kólik jáne logıstıka, energetıka, sý resýrstary, mádenı-gýmanıtarlyq baılanystardy tereńdetýge baǵyttalǵan jobalardy talqylaıdy.

Ózbekstan basshysynyń baspasóz qyzmetinen atap ótkendeı, kezdesý barysynda Qasym-Jomart Toqaev pen Shavkat Mırzıeev jahandyq saıasat jáne aımaqtaǵy mańyzdy máseleler boıynsha pikir almasady.

Munymen birge, prezıdentterdiń qatysýymen Halyqaralyq ónerkásiptik kooperatsııa ortalyǵy jáne birqatar birlesken jobalar iske qosylady. Sapar aıasynda Qazaqstan men Ózbekstan arasyndaǵy strategııalyq áriptestik jáne odaqtastyq qarym-qatynastardy tereńdetýge baǵyttalǵan birneshe mańyzdy qujatqa qol qoıylady.

Al 16 qarashada Qasym-Jomart Toqaev Ortalyq Azııa memleketteri basshylarynyń VII Konsýltatıvtik kezdesýine de qatysady. Atalǵan is-sharaǵa óńir elderiniń prezıdentterimen qatar, Ázerbaıjan basshysy Ilham Álıev qurmetti qonaq retinde shaqyrylǵan.

Eske sala keteıik, birer kún buryn Memleket basshysy Qasym-Jomart Toqaev Reseıge memlekettik saparmen barǵan edi. Onyń barysynda eki eldiń yntymaqtastyǵyn bekemdeı túsetin qujattar qabyldandy.