Qazaqstan men Ózbekstan prezıdentteri BAQ ókilderine arnalǵan brıfıng ótkizdi
TAShKENT. KAZINFORM – Qasym-Jomart Toqaev Prezıdent Shavkat Mırzıeevke jáne barsha ózbek aǵaıynǵa qazaq delegatsııasyna qonaqjaılyq kórsetip, ystyq yqylaspen qarsy alǵany úshin alǵys aıtty. Bul týraly Aqordanyń baspasóz qyzmeti habarlady.
— Qazaq pen ózbek — baýyrlas halyqtar, ejelden enshisi bir tatý kórshiler. Qos halyqtyń bolmysy, salt-dástúri, mádenıeti, dili men tili — uqsas, tarıhy — tamyrlas. Osy qasterli qundylyqtardyń arqasynda qarym-qatynasymyz buryn-sońdy bolmaǵan qarqynmen damyp jatyr. Elderimiz arasynda joǵary deńgeıdegi syndarly ári belsendi saıası dıalog ornaǵan. Saýda-ekonomıkalyq baılanystarymyz jyldan jylǵa nyǵaıyp kele jatyr. Ónerkásip salasynda áleýeti zor ınvestıtsııalyq jobalardy júzege asyryp jatyrmyz. Aımaqtyq deńgeıdegi birlesken is-áreketterdi damytýǵa, qaýipsizdik pen turaqtylyqty qamtamasyz etýge basa mán berip otyrmyz. Buǵan qosa, eki eldiń mádenı-gýmanıtarlyq baılanysy da tereńdeı tústi. Osy saparymnyń basty maqsaty — baýyrlas halyqtar arasyndaǵy dostyq pen tatý kórshilikti bekemdeý, san qyrly yntymaqtastyqtyń jańa joldaryn ashý, túptep kelgende, qazaq-ózbek qarym-qatynastaryn jańa sapaly deńgeıge kóterý, — dedi Qazaqstan Prezıdenti.
Memleket basshysynyń aıtýynsha, búgingi ýaǵdalastyqtar eki eldiń ulttyq múddelerine saı keledi ári halyqtarymyz arasyndaǵy myzǵymas dostyqty, tatý kórshilikti, strategııalyq seriktestik pen odaqtastyqty kórsetedi.
— Qazaqstan Prezıdenti retinde Ózbekstanmen kópjosparly yntymaqtastyqty damytýǵa basymdyq berý mindetim dep sanaımyn. Keıbir sarapshysymaqtar aıtyp júrgendeı, Qazaqstan men Ózbekstan — baqtalas ta, básekeles te emes, kerisinshe, órkendeý jolynda tize qosyp, qatar kele jatqan strategııalyq seriktes, senimdi odaqtas. Halyqtarymyz bir-birin shynaıy qurmet tutatyn jaqyn baýyrlar, dostar, — dedi Prezıdent.
Aıta ketelik prezıdentter kelissózderdiń jáne Qazaqstan men Ózbekstan Joǵary memleketaralyq keńesi ekinshi otyrysynyń qorytyndysy boıynsha Birlesken málimdeme qabyldaǵan edi.