Qasym-Jomart Toqaev pen Shavkat Mırzıeev AlmatyFairai kórmesine bardy
ALMATY. KAZINFORM — Jasandy ıntellektiniń damýyna arnalǵan kórmede memleketter basshylary GovTech, Fintech, BigTech, Smart City baǵyttaryndaǵy ozyq sheshimdermen tanysty.
Sonymen qatar IT-kompanııalardyń jetistikteri, ınnovatsııalyq jáne bilim berý jobalary qoıylǵan arnaýly aımaqty aralap kórdi.
Ózbekstan Prezıdentine Alemai halyqaralyq jasandy ıntellekt ortalyǵynyń tujyrymdamasy tanystyryldy. Joba Qasym-Jomart Toqaevtyń bastamasymen júzege asyrylyp jatyr. Bul ortalyq myńdaǵan mamannyń jasandy ıntellekt salasy boıynsha bilim alýyna jáne startaptardy iske qosýǵa, ǵylymı-zertteý jumystaryn júrgizýge múmkindik beredi.
Qasym-Jomart Toqaev pen Shavkat Mırzıeevke Ulttyq jasandy ıntellekt platformasy tanystyryldy. Onyń kómegimen memlekettik organdardyń jumysyn ońtaılandyrýǵa bolady.
Sonymen qatar prezıdentterge ulttyq ekonomıkadaǵy JI áleýetin arttyrýdy jáne tehnologııalyq kásipkerlikti qoldaýdy kózdeıtin AI-Sana bilim berý baǵdarlamasy týraly málimet berildi.
Prezıdentterge Ortalyq Azııadaǵy iri tehnoparkter alıansy – Central Asian Innovation Hubs qyzmeti jóninde málimet berildi. Byltyr Qazaqstan men Ózbekstannyń iri tehnoparkteriniń lıgasy startaptar ekojúıesin damytý jáne álemdik naryqta ınnovatsııany ilgeriletý maqsatynda osy brend aıasyna birikti.