Qazaqstan men Ózbekstan prezıdenti Qasteev pen Tańsyqbaevtyń týyndylaryn tamashalady
ALMATY. KAZINFORM - Qasym-Jomart Toqaev pen Shavkat Mırzıeev Ábilhan Qasteev atyndaǵy Ulttyq óner mýzeıine bardy.

Mártebeli meımandarǵa Halyq sýretshisi Ábilhan Qasteevtiń ómiri men shyǵarmashylyǵy týraly málimet berildi. Mýzeı kollektsııasynda sýretshiniń sheberligi shyńdalǵan negizgi kezeńderdi aıshyqtaıtyn 450-ge jýyq týyndysy men grafıkalyq keskindemesi saqtaýly tur.
Sonymen qatar eki eldiń memleket basshylary ózbek beıneleý óneriniń negizin salýshylardyń biri, ulty qazaq sýretshisi Oral Tańsyqbaevtyń shyǵarmashylyǵyna arnalǵan retrospektıvalyq kórmeni aralap kórdi.

Kórmege I.V. Savıtskıı atyndaǵy Qaraqalpaqstan memlekettik óner mýzeıinen, Oral Tańsyqbaevtyń mýzeı-úıinen, Ózbekstan memlekettik óner mýzeıinen jáne Ábilhan Qasteev atyndaǵy Ulttyq óner mýzeıinen 76 jumys qoıylǵan.

Prezıdentter qylqalam sheberiniń erekshe qoltańbasy men ulttyq beıneleý ónerine úles qosqan shyǵarmashylyq murasymen tanysty.

Alǵash ret Oral Tańsyqbaevtyń ár kezeńdegi kartınalary bir keńistikte ornalastyryldy. Bul jumystardyń arasynda 1920 jyldardyń sońy men 1930 jyldardyń basyndaǵy alǵashqy týyndylardan bastap jylymyq dáýiriniń úlken polotnolaryna deıin bar.
Buǵan deıin Qazaqstan men Ózbekstan prezıdentteriniń AlmatyFairai kórmesine barǵanyn jazǵan edik.