Qazaqstan men Ózbekstan parlamentaralyq dıalogti keńeıtýge kelisti
ASTANA. KAZINFORM – Qazaqstan Respýblıkasy Parlamenti Senatynyń Tóraǵasy Máýlen Áshimbaev Samarqand qalasynda Ózbekstan Respýblıkasy Olıı Majlısi Senatynyń Tóraǵasy Tanzıla Narbaevamen kezdesti, dep habarlaıdy ÓzA.
Basqosý barysynda parlamentaralyq yntymaqtastyqty tereńdetý máseleleri ǵana emes, eki eldi jaqyndastyryp turǵan ortaq múdde men tarıhı sabaqtastyqtyń máni de keńinen sóz boldy. Saıası, ekonomıkalyq, gýmanıtarlyq jáne óńirlik baǵyttardaǵy yqpaldastyqtyń basym baǵyttary talqylanyp, ózara senimge negizdelgen baılanystardyń jańa belesterge kóterilip kele jatqany aıtyldy.
Suhbat barysynda eki memleket basshylarynyń berik saıası erik-jigeriniń arqasynda Ózbekstan men Qazaqstan qarym-qatynastary jan-jaqty strategııalyq seriktestik pen shynaıy odaqtastyq deńgeıine jetkeni erekshe atap ótildi. Bul – tek saıası ustanymdardyń toǵysýy ǵana emes, túbi bir tarıhtan tamyr tartqan, rýhanı qundylyqtary ortaq halyqtardyń tabıǵı jaqyndasýynyń kórinisi ekeni aıtyldy.
Ortaq tarıhı jady, uqsas dúnıetanym men ǵasyrlar boıy qalyptasqan tatý kórshilik dástúrleri mádenı-gýmanıtarlyq baılanystardyń berik irgetasy bolyp, osy turǵyda Samarqandta ótip jatqan ózbek-qazaq ǵylymı-shyǵarmashylyq zııalylarynyń ekinshi forýmy eki halyqtyń rýhanı sabaqtastyǵyn nyǵaıtyp, zııaly qaýym ókilderiniń erkin pikir almasýyna jol ashatyn mańyzdy alań retinde baǵalandy.
Sondaı-aq kópjaqty formattardaǵy parlamentaralyq ózara is-qımyldyń jandana túskeni, ásirese óńiraralyq forýmdar aıasyndaǵy yntymaqtastyqtyń keńeıip kele jatqany sóz boldy.
Taraptar Ortalyq Azııa elderiniń jetekshi áıelderi dıalogy sheńberindegi ózara is-qımyldy da nazardan tys qalmady. Bıyl Ózbekstannyń atalǵan platformaǵa tóraǵalyq etýi aıasynda Buhara qalasynda kezekti basqosý men Azııa áıelderiniń II forýmyn ótkizý josparlanyp otyrǵany — óńirlik yntymaqtastyqtyń jańa qyrlaryn ashatyn mańyzdy qadam retinde baǵalandy.
Budan bólek, aldaǵy qyrkúıek aıynda Samarqandta ótetin XII Jas parlamentshilerdiń jahandyq forýmy da jańa býyn kóshbasshylarynyń únqatýyna serpin beretin aıtýly oqıǵa bolmaq.
Kezdesý sońynda taraptar ózara senim men ortaq qundylyqtarǵa negizdelgen Ózbekstan – Qazaqstan odaqtastyǵyn odan ári nyǵaıtýǵa, parlamentaralyq dıalogty keńeıtýge jáne birlesken bastamalardy júıeli túrde júzege asyrýǵa eki eldiń de múddeli ekenin rastady.
Eske sala keteıik, Qazaqstan men Ózbekstan yqpaldastyǵy artyp keledi.