Qazaqstan men Ózbekstan ózara saýda kólemin $10 mlrd-qa jetkizbek

ASTANA. QazAqparat - Qazaqstan Premer-Mınıstri Álıhan Smaıylov pen Ózbekstan Premer-Mınıstri Abdýlla Arıpov Astanada ótken TMD Úkimet basshylary keńesiniń otyrysy aıasynda ekijaqty yntymaqtastyqtyń keń aýqymdy máselelerin talqylady.

Bul týraly QazAqparat Úkimettiń baspasóz qyzmetine silteme jasap habarlaıdy.

«Biz ózara tıimdi yntymaqtastyqtyń barlyq baǵyttary boıynsha qarym-qatynastardy odan ári tereńdetýge daıynbyz», — dedi QR Premer-Mınıstri.

Óz tarapynan Abdýlla Arıpov Ózbekstannyń barlyq basym baǵyt boıynsha belsendi jumysty jalǵastyrýǵa daıyn ekenin rastady.

«Qazaqstan – elimizdiń iri saýda seriktesteriniń biri. Sońǵy bes jylda ekijaqty taýar aınalymy eki eseden astam ósti. Endi bizdiń aldymyzda ózara saýda kólemin $10 mlrd-qa jetkizý mindeti tur. Elderimizdiń óńirleri arasyndaǵy ózara tıimdi yntymaqtastyq ta nyǵaıa túsýde», — dedi Abdýlla Arıpov.

Kezdesý qorytyndysy boıynsha Úkimet basshylary salyqtyq retteý, júk tranzıti, bilim berý, energetıka, aýyl sharýashylyǵy jáne t.b. salalardaǵy sharalardy iske asyrýdy kózdeıtin Qazaqstan Respýblıkasy men Ózbekstan Respýblıkasy arasyndaǵy saýda-ekonomıkalyq jáne ınvestıtsııalyq yntymaqtastyqty damytý jónindegi Jol kartasyna qol qoıdy.

Foto: t.me/KZgovernment