Qazaqstan men Ózbekstan ónerkásiptik kooperatsııany tereńdetýge nıetti
TAShKENT. KAZINFORM — Tashkentte Qazaqstan men Ózbekstan ókilderi arasynda bıznes-forým ótti, dep habarlaıdy Kazinform agenttiginiń Tashkenttegi menshikti tilshisi.
Forýmǵa «Atameken» Ulttyq kásipkerler palatasynyń tóraǵasy Qanat Sharlapaev, Qazaqstannyń Ózbekstandaǵy elshisi Eraly Toǵjanov, kórshiles eldiń Saýda-ónerkásip palatasy tóraǵasy Davron Vahabov jáne kásipkerler qatysty.
Іs-sharada sóz sóılegen Qanat Sharlapaev Qazaqstan men Ózbekstan arasyndaǵy ekonomıkalyq yntymaqtastyqtyń basym baǵyttaryna toqtaldy. Búginde «Atameken» Ulttyq kásipkerler palatasy eki memleket arasyndaǵy ınvestıtsııalyq jobalardy iske asyrý, saýda baılanystaryn keńeıtý jáne bıznes úshin qolaıly jaǵdaı jasaý boıynsha yqpaldastyqty ilgeriletip keledi.
— 2025 jyldyń qorytyndysy boıynsha Qazaqstan men Ózbekstan arasyndaǵy taýar aınalymy 16,2%-ǵa ósip, 4,8 mlrd dollarǵa jetti. El eksporty 24,6%-ǵa artyp, 3,52 mlrd dollarǵa teńeldi. 2026 jyldyń alǵashqy bes aıynda ózara saýda kólemi 2,3 mlrd dollarǵa jetip, ótken jyldyń sáıkes kezeńimen salystyrǵanda 37,2%-ǵa ulǵaıdy, — dedi Qanat Sharlapaev.
Sondaı-aq, ol yntymaqtastyqtyń odan ári ilgeriletý úshin óndiristik kooperatsııany keńeıtý jáne birlesip daıyn taýar shyǵarý isine erekshe nazar aýdarý oryndy ekenin málimdedi. Tıisinshe, ózbekstandyq Glasfit Energy kompanııasy men «Qazaqstandyq armatýralyq-oqshaýlaǵysh zaýyty» JShS arasynda memorandýmǵa qol qoıyldy. Oǵan saı, uzaq merzimdi seriktestikti damytý, óndiristik kooperatsııany keńeıtý jáne Ózbekstan naryǵyna baǵyttalatyn otandyq ónimderdiń kólemin arttyrý josparlanyp otyr.
Sonymen qatar kezdesý qorytyndysy boıynsha «Atameken» Ulttyq kásipkerler palatasy men Ózbekstannyń Saýda-ónerkásip palatasy arasynda turaqty jumys isteıtin saraptamalyq jumys tobyn qurý usynyldy.
Forým aıaqtalǵannan keıin qazaqstandyq delegatsııa ókilderi Zelal Textile toqyma kompanııasy, ARCA Mebel jıhaz ortalyǵy, TEXNOPARK ónerkásiptik kesheni jáne CRAFERS kondıterlik fabrıkasynyń jumysymen tanysty.
Eske salaıyq, jarty jylda Qazaqstan men Ózbekstan arasyndaǵy taýar aınalymy 2,7 mlrd dollardan asty.
