Qazaqstan men Ózbekstan mıneraldyq shıkizatty zertteý tájirıbesimen bólisti
ASTANA. KAZINFORM – Halyqaralyq yntymaqtastyq aıasynda «QR MShKQÓ UO» RMK «Shyǵys ǵylymı-zertteý taý-ken metallýrgııa tústi metaldar ınstıtýty» («ShǴZTKMtúsmetı») mamandary «Ózbekgeologııabarlaý» AQ Ortalyq zerthanasy men Ózbekstannyń Samarqand qalasyndaǵy Analıtıkalyq zerthanalyq keshenniń ǵylymı-tehnıkalyq tásilderimen tanysty.
Kezdesý barysynda kender men olardyń baıytylǵan ónimderin synaý, zerthanalardyń biliktilikti tekserý baǵdarlamalaryna qatysýy, zamanaýı ádistemelik jáne tehnıkalyq sheshimderdi qoldaný máselelerine erekshe nazar aýdaryldy.
Qazaqstandyq mamandar ózbekstandyq áriptesterimen mıneraldyq shıkizatty zerthanalyq zertteý, synaq júrgizý ádistemelerin ázirleý jáne qoldaný, standartty úlgilermen jumys isteý, sondaı-aq «ShǴZTKMtúsmetı»-diń Synaq ortalyǵy jaǵdaıynda zertteý nátıjeleriniń dáldigi men senimdiligin qamtamasyz etý baǵytyndaǵy tájirıbelerimen bólisti. Tájirıbe almasý zerthanalyq jumystardyń sapasyn jetildirýge, taldamalyq baqylaýdyń dáldigin arttyrýǵa jáne ónerkásip salalaryndaǵy zertteýlerdiń tıimdiligin kóterýge baǵyttalǵan.
— Zamanaýı zerthana úshin tek qajetti qural-jabdyqtar men tájirıbeniń bolýy jetkiliksiz. Sonymen qatar óz jumys tásilderin halyqaralyq úzdik tájirıbelermen únemi salystyryp, ushtastyryp otyrý mańyzdy. Osyndaı kásibı tájirıbe almasý jańa tehnologııalyq sheshimderdi bilýge, ishki úderisterdi jetildirýge jáne sapa menedjmenti júıesin nyǵaıtýǵa múmkindik beredi, — dedi «QR MShKQÓ UO» RMK «Shyǵys ǵylymı-zertteý taý-ken metallýrgııa tústi metaldar ınstıtýty» «ShǴZTKMtúsmetı» fılıaly dırektorynyń qoldanbaly zertteýler jáne synaqtar jónindegi orynbasary Larısa Kýshakova.
ShǴZTKMtúsmetıdiń Synaq ortalyǵy — geologııa, taý-ken isi jáne metallýrgııa salalarynda synaq ádistemelerin jetildirý jáne engizý baǵytynda jumys isteıtin mamandardan quralǵan akkredıttelgen zerthanalyq baza. Munda shıkizat pen ónerkásip ónimderiniń sapasyn baqylaýdy qamtamasyz etýge, taldaý nátıjeleriniń dáldigin tekserýge, jabdyqtardy kalıbrleýge jáne Qazaqstan men jaqyn shetel kásiporyndarynda qoldanylatyn ádistemelerdi metrologııalyq attestattaýǵa arnalǵan standartty úlgiler ázirlenip, attestattalady. Olardyń qatarynda «Baqyrshyq taý-ken óndirý kásiporny» JShS, «Varvarınskoe» AQ, «VostokHımLab» JShS, «Krisanalyt» JShS, «SGS Kazakhstan LTD» JShS, «TsentrEKOproekt» JShS, «ISO-Tsentrregıonservıs» JShQ (Reseı) jáne basqa da uıymdar bar.
